పంజాబ్ రాష్ట్రంలోని తర్న్ తారన్ బస్టాండ్లో, ప్రేమ వివాహం చేసుకుని కేవలం నెల రోజులు మాత్రమే అయిన 20 ఏళ్ల యువకుడిని అతని భార్య సొంత సోదరులే కత్తులతో పొడిచి కిరాతకంగా చంపిన ఘటన స్థానికంగా తీవ్ర దిగ్భ్రాంతిని, విషాదాన్ని నింపింది.
హత్యకు గురైన జగ్జీత్ సింగ్ అనే యువకుడిని గత నెల క్రితమే అతని ప్రియురాలు జషన్ కౌర్ కుటుంబ సభ్యుల వ్యతిరేకతను కాదని ప్రేమ వివాహం చేసుకుంది. ఈ క్రమంలో, జగ్జీత్ అత్తగారైన కిందర్ కౌర్ తన కుమార్తె ఇంటికి రావాలనుకుంటున్నానని చెప్పి, చాకచక్యంగా జగ్జీత్ను తర్న్ తారన్ బస్టాండ్కు పిలిపించింది. అత్తగారిపై ఉన్న గౌరవంతో దారిలో మిఠాయిలు, శీతల పానీయాలు కొనుగోలు చేసుకుని జగ్జీత్ బస్టాండ్కు చేరుకున్నాడు.
అయితే, అక్కడ అతనికి స్వాగతం పలకడానికి బదులు కాపుకాసి ఉన్న బావమరుదులు జస్ప్రీత్ సింగ్, హర్ప్రీత్ సింగ్లు పథకం ప్రకారం అతన్ని చుట్టుముట్టి విచక్షణారహితంగా కత్తులతో దాడి చేయడం ప్రారంభించారు. జగ్జీత్ కుప్పకూలి కిందపడిపోయినప్పటికీ వారి దాడి ఆగలేదు. అతని తల, మెడ భాగాలతో పాటు శరీరం మొత్తం 60కి పైగా తీవ్రమైన కత్తిపోట్లు ఉన్నట్లు పోలీసులతో పాటు కుటుంబ సభ్యులు కన్నీటిపర్యంతమవుతూ తెలిపారు.
ఈ కిరాతక దాడిని అడ్డుకోవడానికి ప్రయత్నించిన గుర్విందర్ సింగ్ అనే బాటసారి ఎంతో ధైర్యసాహసాలు ప్రదర్శించి నిందితుడు జస్ప్రీత్ సింగ్ను పట్టుకునేందుకు యత్నించాడు. ఆ పెనుగులాటలో అతనికి కూడా తీవ్ర గాయాలయ్యాయి.
ఈ దారుణంపై మృతుడు జగ్జీత్ తండ్రి తర్సేమ్ సింగ్ మాట్లాడుతూ.. తన కుమారుడు, జషన్ కౌర్ చాలా కాలంగా ప్రేమించుకుంటున్నారని, అమ్మాయి తరఫు కుటుంబం మొదటి నుంచీ ఈ పెళ్లికి తీవ్ర వ్యతిరేకంగా ఉండటంతో ఇల్లు వదిలి వెళ్లి నెల క్రితం వివాహం చేసుకున్నారని తెలిపారు. ఈ పరువు హత్యకు ప్రేమ పెళ్లే ప్రధాన కారణమని కుటుంబ సభ్యులు ఆరోపించారు.
సమాచారం అందుకున్న వెంటనే ఘటనా స్థలానికి చేరుకున్న పోలీసులు, ఫోరెన్సిక్ నిపుణులు ఆధారాలు సేకరించారు. స్థానికుల సహాయంతో జస్ప్రీత్ సింగ్ను అదుపులోకి తీసుకోగా, పరారీలో ఉన్న మరో నిందితుడు హర్ప్రీత్ సింగ్ కోసం పోలీసులు ముమ్మరంగా గాలిస్తున్నారు. అంతేకాకుండా, ఈ పక్కా ప్లాన్ వెనుక ప్రమేయం ఉన్న మిగిలిన వారిపై కూడా పోలీసులు సమగ్ర దర్యాప్తు జరుపుతున్నారు.
Leave a Reply