భారత క్రికెట్ స్టార్ విరాట్ కోహ్లీ, బాలీవుడ్ నటి అనుష్క శర్మ దంపతులు తమ నివాసాన్ని భారత్ నుండి లండన్కు మార్చుకోవడంపై సోషల్ మీడియాలో నిరంతరం పెద్ద ఎత్తున చర్చలు జరుగుతున్నాయి.
భారత్లో దక్కిన అపారమైన కీర్తి ప్రతిష్టలను, విలాసవంతమైన జీవితాన్ని వదిలి వారు లండన్లో ఎందుకు స్థిరపడ్డారనేది చాలా మందికి జవాబు దొరకని ప్రశ్నగానే మిగిలిపోయింది. ఈ నేపథ్యంలో ప్రముఖ నటి మాధురీ దీక్షిత్ భర్త, ప్రముఖ వైద్యుడు డాక్టర్ శ్రీరామ్ నేనే.. విరాట్-అనుష్క తీసుకున్న ఈ నిర్ణయం వెనుక ఉన్న అసలు కారణాన్ని వెల్లడిస్తూ మౌనాన్ని వీడారు.
భారత్లో సెలబ్రిటీలు ఎదుర్కొనే రోజువారీ సవాళ్లు, వ్యక్తిగత స్వేచ్ఛ లేకపోవడం గురించి మాట్లాడిన డాక్టర్ శ్రీరామ్ నేనే.. తాను కూడా అమెరికా నుండి భారతదేశానికి వచ్చినప్పుడు ఇలాంటి పరిస్థితులనే ఎదుర్కొన్నట్లు పేర్కొన్నారు.
భారత్లో విరాట్ కోహ్లీ, అనుష్క శర్మ లాంటి అత్యున్నత స్థాయి స్టార్లకు సామాన్యుల్లా బయట రోడ్లపై నడవడానికి గానీ, ఏదైనా రెస్టారెంట్కు వెళ్లి ప్రశాంతంగా భోజనం చేయడానికి గానీ వీలుండదు. ఎక్కడికి వెళ్లినా చుట్టుముట్టే అభిమానుల గుంపు, ఫొటోగ్రాఫర్ల ఒత్తిడి, మీడియా నిరంతర నిఘా వల్ల వారి వ్యక్తిగత జీవితం పూర్తిగా స్తంభించిపోతుంది.
ముఖ్యంగా తమ పిల్లలైన వామిక, అకాయ్లకు సాధారణ, సహజమైన బాల్యాన్ని అందించాలనే ఉన్నతమైన ఉద్దేశంతోనే వారు లండన్లో స్థిరపడే నిర్ణయం తీసుకున్నారని ఆయన వివరించారు. లండన్ వంటి విదేశాలలో విరాట్ కోహ్లీ చాలా మందికి తెలిసినప్పటికీ, అక్కడ వారి వ్యక్తిగత స్వేచ్ఛకు ఎలాంటి భంగం కలగకుండా ప్రశాంతంగా జీవించవచ్చని తెలిపారు.
డబ్బు, హోదా కంటే కూడా కుటుంబంతో, పిల్లలతో ప్రశాంతంగా బతకడానికి అవసరమైన వ్యక్తిగత స్వేచ్ఛే మనిషికి అత్యంత ముఖ్యమైనదని గుర్తించే కోహ్లీ దంపతులు ఈ తెలివైన నిర్ణయం తీసుకున్నారని డాక్టర్ శ్రీరామ్ నేనే స్పష్టం చేశారు.
Leave a Reply