వరంగల్ జిల్లా నెక్కొండ మండలం బొల్లికొండ గ్రామానికి చెందిన అఖిల (20) అనే యువతికి, ఓ ప్రైవేట్ హౌసింగ్ ఫైనాన్స్ కంపెనీలో మేనేజర్‌గా పనిచేస్తున్న బానోత్ హుస్సేన్‌తో రెండేళ్ల క్రితం వివాహమైంది.
వీరికి ఒక సంవత్సరం వయసున్న పాప ఉంది. ఇటీవల అఖిల తన బిడ్డతో కలిసి పుట్టింటికి వెళ్లింది.
సంఘటన జరిగిన రోజు పాప ఏడుస్తుండటంతో, తండ్రితో మాట్లాడించాలనే ఉద్దేశంతో అఖిల తన భర్త హుస్సేన్‌కు వీడియో కాల్ చేసింది. అయితే, ఆఫీస్ పనిలో తీరిక లేకుండా ఉండటం వల్ల హుస్సేన్ ఆ సమయంలో ఫోన్ ఎత్తలేదు. దీంతో తీవ్ర మనస్తాపానికి గురైన ఆమె, వెంటనే ఒంటరిగా అత్తవారింటికి చేరుకుంది.
ఇంట్లో ఎవరూ లేని సమయంలో తీవ్ర ఆగ్రహావేశాలతో ఎలుకల మందు తిని ఆత్మహత్యాయత్నానికి పాల్పడింది. స్పృహతప్పి పడి ఉన్న ఆమెను చూసిన కుటుంబసభ్యులు వెంటనే భర్త హుస్సేన్‌కు సమాచారం అందించి, స్థానిక జిల్లా ప్రభుత్వాసుపత్రికి తరలించారు. అక్కడ వైద్యులు అత్యవసర చికిత్స అందించినప్పటికీ ఫలితం లేకపోయింది; సోమవారం తెల్లవారుజామున అఖిల పరిస్థితి విషమించి కన్నుమూసింది.
కేవలం ఏడాది వయసున్న పసిగుడ్డును అనాథగా వదిలి తల్లి ప్రాణాలు కోల్పోవడం ఆ ప్రాంతంలో తీవ్ర విషాదాన్ని నింపింది. మృతురాలి కుటుంబసభ్యులు ఇచ్చిన ఫిర్యాదు మేరకు పోలీసులు కేసు నమోదు చేసుకుని దర్యాప్తు చేస్తున్నారు.