ముంబై కోస్టల్ రోడ్డు అండర్‌పాస్‌ టన్నెల్‌లో అర్ధరాత్రి వేళ పలు లగ్జరీ కార్లు మితిమీరిన వేగంతో ఒకదానినొకటి ఓవర్‌టేక్ చేసుకుంటూ రేసింగ్‌కు పాల్పడిన ఘటన తీవ్ర కలకలం రేపింది.
రాత్రి సుమారు 11 గంటల సమయంలో చోటుచేసుకున్న ఈ ఘటనను సనా ఖాన్ అనే బాధ్యతాయుత పౌరుడు వీడియో తీశారు. అందులో పసుపు, ఎరుపు రంగుల్లో ఉన్న సూపర్‌కార్లతో సహా దాదాపు 6 నుంచి 7 లగ్జరీ వాహనాలు టన్నెల్‌లో అత్యంత ప్రమాదకర రీతిలో దూసుకెళ్తున్న దృశ్యాలు వెలుగులోకి వచ్చాయి.
ఈ వీడియో సోషల్ మీడియాలో వైరల్‌గా మారడంతో మెరైన్ డ్రైవ్ పోలీసులు కేసు నమోదు చేసుకుని ముమ్మర దర్యాప్తు ప్రారంభించారు. ఎమర్జెన్సీ వాహనాలు, బస్సుల కోసం కేటాయించిన ప్రత్యేక లేన్‌లో ఈ కార్లు ప్రయాణించినట్లు పోలీసులు తెలిపారు. అంతేకాకుండా నిర్దేశిత వేగ పరిమితిని ఉల్లంఘించడంతో పాటు ట్రాఫిక్ లేన్ నిబంధనలను పాటించలేదని కార్ల డ్రైవర్లపై అభియోగాలు మోపారు.
ప్రస్తుతం ఈ రేసింగ్‌కు పాల్పడిన వాహనాలను, వాటిని నడిపిన వ్యక్తులను గుర్తించేందుకు సనా ఖాన్ తీసిన వీడియో ఆధారాలతో పాటు టన్నెల్‌లోని సీసీటీవీ ఫుటేజీలను పోలీసులు క్షుణ్ణంగా పరిశీలిస్తున్నారు. నిబంధనలను ఉల్లంఘించి ప్రజల ప్రాణాలకు ముప్పు కలిగించేలా వ్యవహరించిన వారిపై చట్టపరంగా కఠిన చర్యలు తీసుకునే అవకాశముంది.