సాధారణంగా మధుమేహం అంటే రక్తంలో చక్కెర స్థాయిని పరీక్షించుకుని, దానికి అనుగుణంగా మందులు తీసుకుంటే సరిపోతుందని చాలామంది భావిస్తుంటారు.
అయితే ముఖ్యంగా మహిళల్లో మధుమేహం కేవలం రక్తంలో చక్కెర స్థాయిపైనే ప్రభావం చూపదని వైద్య నిపుణులు చెబుతున్నారు. ఇది వారి మానసిక ఆరోగ్యం, హార్మోన్ల సమతుల్యత, శారీరక శక్తి వంటి అంశాలపై కూడా ప్రభావం చూపే అవకాశం ఉందని వివరిస్తున్నారు.
మధుమేహంతో బాధపడుతున్న మహిళల్లో కనిపించే అధిక శారీరక అలసట, మానసిక ఒత్తిడి వంటి సమస్యలపై వైద్యులు చెబుతున్న సూచనలు ప్రస్తుతం అవగాహన కల్పిస్తున్నాయి.
మహిళల శరీరంలో సహజంగా జరిగే హార్మోన్ల మార్పులు, రుతుక్రమం, గర్భధారణ, మెనోపాజ్ వంటి దశలు ఇన్సులిన్ పనితీరుపై ప్రభావం చూపవచ్చు.
దీనికి తోడు కుటుంబ బాధ్యతలు, ఉద్యోగ ఒత్తిడి వంటి కారణాలతో నిరంతరం మానసిక ఒత్తిడికి గురైతే.. శరీరంలో కార్టిసోల్ వంటి ఒత్తిడి హార్మోన్ల స్థాయులు పెరిగి రక్తంలో చక్కెర స్థాయులు పెరిగే అవకాశం ఉంటుంది.
దీంతో రక్తంలో చక్కెర స్థాయిని నియంత్రించడానికి ఇబ్బందులు ఏర్పడటంతో పాటు, కొంతమంది మహిళల్లో ఆందోళన, నిరాశ, తీవ్రమైన అలసట వంటి సమస్యలు కూడా కనిపించవచ్చని వైద్యులు చెబుతున్నారు.
అందువల్ల మధుమేహంతో బాధపడుతున్న మహిళలకు చికిత్స అందించే సమయంలో కేవలం రక్త పరీక్షల ఫలితాలను మాత్రమే కాకుండా.. వారి మానసిక ఆరోగ్యం, నిద్ర, జీవనశైలి, హార్మోన్ల మార్పులు వంటి అంశాలను కూడా పరిగణనలోకి తీసుకోవడం అవసరమని నిపుణులు సూచిస్తున్నారు.
మానసిక ఒత్తిడిని తగ్గించుకోవడం, తగినంత నిద్రపోవడం, ఆరోగ్యకరమైన ఆహారం తీసుకోవడం, క్రమం తప్పకుండా శారీరక వ్యాయామం చేయడం వంటి జీవనశైలి మార్పులు మధుమేహ నియంత్రణలో సహాయపడవచ్చు.
అయితే ప్రతి మహిళలో పరిస్థితి భిన్నంగా ఉండొచ్చు. కాబట్టి మందులు లేదా చికిత్సలో మార్పులు చేసుకునే ముందు వైద్యుల సలహా తీసుకోవడం చాలా ముఖ్యం.
మహిళల్లో మధుమేహాన్ని కేవలం చక్కెర స్థాయితో మాత్రమే కాకుండా.. శారీరక, మానసిక ఆరోగ్యాన్ని కలిపి చూడాల్సిన అవసరం ఉందని ఈ అంశం మరోసారి గుర్తుచేస్తోంది.