యాపిల్ సంస్థ కొత్తగా మార్కెట్లోకి తీసుకొచ్చిన మొట్టమొదటి ఫోల్డబుల్ మోడల్ ‘ఐఫోన్ డుయో’ (iPhone Duo) ధరను చూసి, ప్రముఖ లగ్జరీ దుస్తుల బ్రాండ్ ‘బ్లూయార్ంగ్’ (Bluorng) సహ వ్యవస్థాపకుడు సిద్ధార్థ్ సబర్వాల్ తీవ్ర ఆశ్చర్యం వ్యక్తం చేస్తూ ఇన్‌స్టాగ్రామ్‌లో పెట్టిన వీడియో నెట్టింట తెగ వైరలవుతోంది.
ఆ వీడియోలో ఆయన మాట్లాడుతూ.. “నాకు యాపిల్ ఉత్పత్తులంటే చాలా ఇష్టం. కానీ దీని 2TB మోడల్ ధర ఏకంగా ₹4.5 లక్షలు ఉండటం కాస్త ఎక్కువే. బేస్ మోడల్ ప్రారంభ ధరే ₹3 లక్షలుగా ఉంది. కాబట్టి ₹4.5 లక్షలు అనేది ఆలోచించాల్సిన విషయమే. అందుకే దయచేసి ఇకపై ఎవరూ మా బ్లూయార్ంగ్ బట్టల ధరలు ఎక్కువని కంప్లయింట్ చేయకండి” అంటూ చమత్కరించారు.
అయితే ఆయన వీడియోపై నెటిజన్లు ఘాటుగా స్పందిస్తున్నారు. “ఒక సాధారణ కాటన్ టీ-షర్టును వేల రూపాయల అధిక ధరకు అమ్మే మీరే, ఫోన్ రేటు చూసి ముక్కున వేలేసుకోవడం విడ్డూరంగా ఉంది. ఇంత భారీ ధరలు పెట్టే ఆలోచనను యాపిల్ సంస్థ మీ దగ్గర నుంచే నేర్చుకుని ఉంటుంది” అంటూ సెటైర్లు వేస్తున్నారు. భారత్‌లో ఈ సరికొత్త ‘ఐఫోన్ డుయో’ బేస్ మోడల్ ధర ₹2,99,900 కాగా, 2TB టాప్-ఎండ్ వేరియంట్ ధర ₹4,49,900గా నిర్ణయించడం గమనార్హం.