ఉత్తరప్రదేశ్ రాష్ట్రం మహారాజ్‌గంజ్ జిల్లాలోని ఓ గ్రామంలో, కేవలం 3 అడుగుల స్థల వివాదం కోసం సొంత కుటుంబంలోనే రక్తపాతం జరిగే పరిస్థితి తలెత్తిన వేళ.. 16 ఏళ్ల ఓ బాలిక ప్రదర్శించిన అసాధారణ ధైర్యసాహసం యావత్ పోలీస్ శాఖను, ప్రజలను తీవ్ర ఆశ్చర్యానికి గురిచేసింది.
భూ తగాదాలో తండ్రికి, బాబాయికి మధ్య వాగ్వాదం తీవ్రస్థాయికి చేరింది. ఆవేశంలో తండ్రి తన లైసెన్స్డ్ తుపాకీని తీసి కాల్పులు జరిపేందుకు సిద్ధమైన తరుణంలో.. ఆ బాలిక అత్యంత సమయస్ఫూర్తితో వ్యవహరించి తండ్రి చేతిలోని తుపాకీని లాక్కుని నేరుగా పోలీస్ స్టేషన్‌కే పరుగెత్తుకొచ్చింది.
భుజాన భారీ వేట తుపాకీని తగిలించుకుని, ఆయాసపడుతూ పోలీస్ స్టేషన్‌లోకి ప్రవేశించిన ఆ బాలికను చూసి అక్కడున్న పోలీసులు, అధికారులు ఒక్కసారిగా నివ్వెరపోయారు.
అధికారుల ఎదుట ఆ తుపాకీని కింద పెడుతూ.. “సార్! ముందు ఈ తుపాకీని తీసుకుని మీ స్వాధీనంలో ఉంచుకోండి. లేదంటే ఈరోజు మా ఇంట్లో హత్యలు జరిగి రక్తపుటేరులు పారతాయి, మా కుటుంబమే నాశనమైపోతుంది సార్” అంటూ ఆ బాలిక కన్నీటి పర్యంతమై బోరున ఏడుస్తూ జరిగిన విషయాన్ని పూసగుచ్చినట్లు వివరించింది.
బాలిక అద్భుతమైన సమయస్ఫూర్తిని, సాహసాన్ని చూసి అవాక్కయిన మహారాజ్‌గంజ్ పోలీసులు.. ఏమాత్రం ఆలస్యం చేయకుండా వెంటనే ఘటనా స్థలానికి చేరుకుని గొడవపడుతున్న తండ్రిని, బాబాయిని అదుపులోకి తీసుకుని విచారణ చేపట్టారు.
కేవలం 3 అడుగుల స్థలం కోసం సొంత తమ్ముడినే కాల్చి చంపేందుకు సిద్ధపడిన తండ్రి రక్తదాహాన్ని.. తన ప్రాణాలను సైతం లెక్కచేయకుండా తుపాకీని లాక్కొచ్చి నిలువరించిన ఆ బాలిక ధైర్యాన్ని నెటిజన్లు, స్థానిక ప్రజలు ప్రశంసలతో ముంచెత్తుతున్నారు.