దాత నుంచి సేకరించిన మానవ గుండెను.. కాలంతో పోటీపడుతూ కేవలం 16 నిమిషాల్లో 20 కిలోమీటర్ల దూరం తరలించి నోయిడా ఆసుపత్రికి చేర్చిన ఉత్కంఠభరిత, స్పూర్తిదాయక ఘటన ఉత్తరప్రదేశ్‌లో చోటుచేసుకుంది.
ఢిల్లీ మరియు నోయిడా నగర ట్రాఫిక్ పోలీసులు సంయుక్తంగా ఏర్పాటు చేసిన ‘గ్రీన్ కారిడార్’ (ప్రత్యేక రవాణా మార్గం) వల్లే ఈ ప్రాణదాత మిషన్ విజయవంతమైంది. బ్రెయిన్ డెడ్ అయిన ఓ వ్యక్తి నుంచి సేకరించిన గుండెను.. నోయిడాలోని ఓ ప్రముఖ ఆసుపత్రిలో ప్రాణాపాయ స్థితిలో ఉన్న రోగికి అత్యవసరంగా గుండె మార్పిడి శస్త్రచికిత్స ద్వారా అమర్చాల్సి వచ్చింది.
సాధారణ ట్రాఫిక్ రద్దీలో ఈ 20 కిలోమీటర్ల దూరాన్ని చేరుకోవడానికి కనీసం గంటకు పైగా సమయం పడుతుంది. అయితే ట్రాఫిక్ పోలీసులు క్షణాల్లో స్పందించి మార్గమధ్యంలోని అన్ని ట్రాఫిక్ సిగ్నల్స్‌ను గ్రీన్ లైట్లుగా మార్చేసి, అంబులెన్స్ ఎలాంటి ట్రాఫిక్ అడ్డంకులు లేకుండా వేగంగా దూసుకెళ్లేందుకు ప్రత్యేక కారిడార్‌ను సిద్ధం చేశారు.
అంబులెన్స్ డ్రైవర్ అత్యంత చాకచక్యంగా, శరవేగంగా వాహనాన్ని నడిపి నిర్దేశిత సమయం కంటే ముందే నోయిడా ఆసుపత్రికి గుండెను భద్రంగా చేర్చాడు. అక్కడ అప్పటికే సిద్ధంగా ఉన్న వైద్యుల బృందం తక్షణమే శస్త్రచికిత్స మొదలుపెట్టి.. ఆ గుండెను రోగికి విజయవంతంగా అమర్చి పునర్జన్మనిచ్చింది.
ఢిల్లీ-నోయిడా రహదారిపై అంబులెన్స్ రయ్‌మంటూ దూసుకెళ్లిన ఈ రోమాంచిత వీడియో ప్రస్తుతం సోషల్ మీడియాలో విపరీతంగా వైరలవుతోంది. సకాలంలో స్పందించి ప్రాణం నిలబెట్టిన ట్రాఫిక్ పోలీసులు, వైద్య బృందాలపై నెటిజన్లు ప్రశంసల జల్లు కురిపిస్తున్నారు.