భారత్‌ను సందర్శించాలనుకునే థాయ్‌లాండ్ పౌరులకు భారత ప్రభుత్వం తీపి కబురు అందించింది.
థాయ్‌లాండ్ దేశస్థులు 30 రోజుల చెల్లుబాటుతో కూడిన డబుల్ ఎంట్రీ ఈ-టూరిస్ట్ వీసాను (e-Tourist Visa) ఎలాంటి వీసా రుసుము లేకుండా ఉచితంగా పొందవచ్చని బ్యాంకాక్‌లోని భారత రాయబార కార్యాలయం ప్రకటించింది.
ఈ వెసులుబాటు ద్వారా పర్యాటకులు ఒకే వీసాతో 30 రోజుల వ్యవధిలో రెండుసార్లు భారత్‌లోకి ప్రవేశించే అవకాశం లభిస్తుంది. అంటే, ఈ 30 రోజుల వ్యవధిలో భారత్ నుంచి పొరుగు దేశాలకు వెళ్లి మళ్లీ తిరిగి రావాలనుకునే పర్యాటకులకు ఈ డబుల్ ఎంట్రీ సదుపాయం ఎంతో సౌకర్యవంతంగా ఉంటుంది.
అయితే దీనిని “వీసా రహిత ప్రవేశం” (Visa-free entry) గా భావించకూడదు. థాయ్ పౌరులు భారత ప్రభుత్వ అధికారిక ఈ-వీసా పోర్టల్ ద్వారా దరఖాస్తు చేసుకుని, ముందస్తు అనుమతి పొందిన తర్వాతే భారత్‌కు ప్రయాణించాల్సి ఉంటుంది. ఈ విధానంలో కేవలం ప్రాసెసింగ్ ఫీజును మాత్రమే పూర్తిగా మినహాయించారు.
ఈ ఉచిత వీసా సదుపాయం డిసెంబర్ 31, 2027 వరకు లేదా తదుపరి ఆదేశాలు వచ్చే వరకు అమల్లో ఉంటుందని భారత రాయబార కార్యాలయం స్పష్టం చేసింది. భారత్-థాయ్‌లాండ్ మధ్య పర్యాటకరంగాన్ని ప్రోత్సహించడంతో పాటు ఇరు దేశాల ప్రజల మధ్య సంబంధాలను మరింత బలోపేతం చేసే లక్ష్యంతోనే ఈ నిర్ణయం తీసుకున్నారు.