ఉదయం 6 గంటలు అంటే చాలామందికి కొత్త రోజంటే ఎంతో ఆశతో, ఉత్సాహంతో మొదలయ్యే సమయం.
కానీ, ప్రపంచంలోని ప్రముఖ ఐటీ దిగ్గజ సంస్థల్లో ఒకటైన ఒరాకిల్ (Oracle) ఉద్యోగులకు మాత్రం ఆ వేకువజాము తమ జీవితాలనే తలకిందులు చేసే చేదువార్తతో తెల్లవారింది.
ఎలాంటి ముందస్తు సమాచారం లేకుండా, వేకువజామున 6 గంటలకే సంస్థ హెడ్‌క్వార్టర్స్ నుంచి ఉద్యోగుల ఈమెయిల్‌కు ఒక మెసేజ్ వచ్చి పడింది. అందులో.. “సంస్థ పునర్వ్యవస్థీకరణ (Restructuring) కారణంగా కొన్ని కఠినమైన నిర్ణయాలు తీసుకోక తప్పడం లేదు” అనే ముక్కతో ఎంతోమంది ఉద్యోగులను క్షణాల వ్యవధిలోనే రోడ్డున పడేశారు.
సంవత్సరాలుగా సంస్థ ఎదుగుదల కోసం రేయింబవళ్లు కష్టపడి పనిచేసిన ఉద్యోగులు, ఉదయాన్నే ఉద్యోగం ఊడిందనే వార్త తెలిసి చెప్పలేనంత శోకంలో మునిగిపోయారు. టెక్ ప్రపంచంలో ఇప్పటికే లేఆఫ్స్ ఉధృతి తీవ్రంగా కొనసాగుతున్న నేపథ్యంలో, ఒరాకిల్ చేపట్టిన ఈ ఆకస్మిక తొలగింపులు ప్రపంచవ్యాప్తంగా ఉన్న ఐటీ ఉద్యోగుల్లో తీవ్ర భయాందోళనలను రేకెత్తించాయి.
ఉద్యోగం కోల్పోయిన ఉద్యోగులు సోషల్ మీడియా వేదికగా తమ ఆవేదనను వెళ్లగక్కుతున్నారు. “ఇన్నేళ్ల పాటు అంకితభావంతో పనిచేసినందుకు మాకిచ్చిన బహుమతి ఇదేనా?”, “వచ్చే నెల ఖర్చులు, కుటుంబ బాధ్యతలు ఎలా నెరవేర్చాలి?” అంటూ కన్నీళ్లతో ప్రశ్నిస్తున్నారు.
కంపెనీల ఇలాంటి ఆకస్మిక నిర్ణయాలు ఉద్యోగుల జీవనోపాధినే కాకుండా, వారి మానసిక ఆరోగ్యాన్ని కూడా తీవ్రంగా దెబ్బతీస్తున్నాయి. ఆర్టిఫిషియల్ ఇంటెలిజెన్స్ (AI) వంటి నూతన సాంకేతికతల రాక, ప్రపంచవ్యాప్త ఆర్థిక మందగమనం వంటి కారణాలను చూపుతూ బడా సంస్థలు నిర్దాక్షిణ్యంగా ఉద్యోగుల తొలగింపులకు పాల్పడుతున్నాయి.
కేవలం లాభాపేక్షే ధ్యేయంగా పనిచేసే కార్పొరేట్ ప్రపంచంలో, ఉద్యోగుల శ్రమకు, అంకితభావానికి ఎంతమాత్రం భద్రత లేకుండా పోయిందనడానికి ఒరాకిల్ తాజా ఉదంతమే నిదర్శనం.
సంస్థలు తమ ఆర్థిక స్థిరత్వం కోసం ఉద్యోగులను బలిపశువులను చేసే ఈ ధోరణి ఇలాగే కొనసాగితే, ఐటీ రంగం భవిష్యత్తుపైనే కాకుండా, అందులో పనిచేస్తున్న లక్షలాది మంది యువత ఉద్యోగ భద్రతపై కూడా తీవ్రమైన ప్రశ్నలు, భయాలు మిగులుతున్నాయి.