ఉత్తరప్రదేశ్ రాష్ట్రం కాన్పూర్‌లోని చకేరి పోలీస్ స్టేషన్ ఎదుట ఓ యువకుడు ఆకస్మికంగా తనను తాను గాయపరుచుకోవడానికి ప్రయత్నించిన ఘటన తీవ్ర కలకలం రేపింది.
సెప్టెంబర్ 13 సాయంత్రం సుమారు 6:10 గంటల ప్రాంతంలో పోలీస్ స్టేషన్ బయట నిలబడి ఉన్న ఆ యువకుడు, అకస్మాత్తుగా తన జేబులోంచి బ్లేడ్ తీసినట్లు సమాచారం. మరుక్షణమే అతడు తనను తాను గాయపరుచుకోవడం చూసి అక్కడున్న స్థానికులు ఒక్కసారిగా దిగ్భ్రాంతికి గురయ్యారు.
యువకుడి విపరీత ప్రవర్తనను గమనించిన పోలీసులు వెంటనే స్పందించి అతడిని నిలువరించే ప్రయత్నం చేశారు. క్షణాల్లో అతని చేతిలో ఉన్న బ్లేడ్‌ను లాక్కున్నారు. అప్పటికే తీవ్రంగా రక్తం కారుతుండటంతో పోలీసులు వెంటనే ప్రథమ చికిత్స అందించారు. అనంతరం ఆ యువకుడిని వెంటనే కాన్షీరామ్ ఆసుపత్రికి తరలించారు. అక్కడ ప్రాథమిక చికిత్స అందించినప్పటికీ పరిస్థితి విషమంగా ఉండటంతో, మెరుగైన వైద్యం కోసం హాలెట్ ఆసుపత్రికి తరలించారు.
ఈ ఘటనపై స్టేషన్ ఇన్‌ఛార్జ్ అజయ్ ప్రకాశ్ మిశ్రా మాట్లాడుతూ.. ఆ యువకుడు తీవ్రంగా మద్యం మత్తులో ఉన్నట్లు తెలిపారు. అతడు తనను తాను ఎందుకు గాయపరుచుకోవాలనుకున్నాడనే విషయం ఇంకా స్పష్టంగా తెలియరాలేదు. ఘటనకు ముందు ఎవరితోనైనా గొడవ జరిగిందా లేదా ఇతరత్రా ఏవైనా సమస్యల వల్ల ఇలాంటి తీవ్ర నిర్ణయం తీసుకున్నాడా అనే కోణంలో పోలీసులు దర్యాప్తు చేస్తున్నారు. యువకుడి ఆరోగ్యం నిలకడగా మారిన తర్వాత అతని వాంగ్మూలాన్ని నమోదు చేస్తామని పోలీసులు వెల్లడించారు.
ఇదే సమయంలో ఆ యువకుడి గుర్తింపును నిర్ధారించి, అతని కుటుంబాన్ని సంప్రదించేందుకు పోలీసులు ప్రయత్నిస్తున్నారు. అతని వద్ద లభించిన వస్తువులు, ఇతర ఆధారాల సాయంతో దర్యాప్తు కొనసాగిస్తున్నారు. అసలు అతడు పోలీస్ స్టేషన్‌కు ఎక్కడి నుంచి వచ్చాడు? ఘటనకు ముందు అతని కదలికలు ఎలా ఉన్నాయి? అనే వివరాలను కూడా సేకరిస్తున్నారు. ప్రస్తుతం చికిత్స పొందుతున్న ఆ యువకుడి నుంచి వాంగ్మూలం తీసుకున్న తర్వాతే ఈ ఘటన వెనుక ఉన్న అసలు కారణాలు వెలుగులోకి వచ్చే అవకాశం ఉంది.