ఉత్తరప్రదేశ్ రాష్ట్రంలోని ఆగ్రా కంటోన్మెంట్ రైల్వే పోలీసులు, రైళ్లలోని ఏసీ కోచ్ ప్రయాణికులే లక్ష్యంగా వరుస చోరీలకు పాల్పడుతున్న ఇద్దరు అంతర్రాష్ట్ర దొంగలను అరెస్ట్ చేశారు.
పీలీభీత్‌కు చెందిన పునీత్, లక్నోకు చెందిన ఆకాశ్ పాల్ ప్రస్తుతం పోలీసుల వలలో చిక్కారు.
వీరిద్దరూ ప్రధానంగా నడుస్తున్న రైళ్లలోని ఏసీ బోగీల్లో ప్రయాణించే మహిళలనే టార్గెట్ చేసేవారు. ప్రయాణికులు గాఢ నిద్రలో ఉన్న సమయంలో వారి హ్యాండ్‌బ్యాగుల జిప్పులను నైపుణ్యంగా తెరిచి, అందులోని ఖరీదైన బంగారు ఆభరణాలు, నగదును చాకచక్యంగా దొంగిలించడాన్ని అలవాటుగా చేసుకున్నారు.
ఈ అరెస్టుతో గత ఫిబ్రవరి, ఆగస్టు నెలల్లో ఆగ్రా పరిధిలో జరిగిన రెండు భారీ రైలు చోరీ కేసులను పోలీసులు ఛేదించారు. వీరి వద్ద నుంచి దాదాపు రూ. 25 లక్షల విలువైన చోరీ సొత్తు, ఇతర వస్తువులను స్వాధీనం చేసుకున్నారు. వీరు ఇంకా ఎక్కడెక్కడ చేతివాటం ప్రదర్శించారనే కోణంలో పోలీసులు విచారణ జరుపుతున్నారు.
ఈ కేసులో పట్టుబడిన ప్రధాన నిందితుడు పునీత్ నేర చరిత్ర పోలీసులనే విస్తుపోయేలా చేసింది. విచారణలో తాను 2017లో నీట్ పరీక్షలో ఉత్తీర్ణత సాధించినట్లు తెలిపాడు. అయితే ఆ పరీక్ష రద్దు కావడం, ఎంబీబీఎస్ చదువు గురించిన పలు వివరాలను పోలీసుల ఎదుట వెల్లడించాడు. అయితే అతడు చెప్పిన వివరాలు ఎంతవరకు నిజమనే విషయాన్ని పోలీసులు నిర్ధారించుకుంటున్నారు.
అంతేకాకుండా, తాను ప్రేమించిన యువతి క్యాన్సర్ బారిన పడటంతో ఆమె వైద్య ఖర్చుల కోసమే దాదాపు రూ. 80 లక్షలు ఖర్చు చేసినట్లు పునీత్ పేర్కొన్నాడు. ఈ వివరాలు కూడా ఇంకా అధికారికంగా ధ్రువీకరించాల్సి ఉంది.
గతంలో లక్నోలో హుక్కా పార్లర్ నడిపిన పునీత్, కరోనా లాక్‌డౌన్ తర్వాత వ్యాపారంలో భారీ నష్టాలు రావడంతో మూసివేసి ఈ దొంగతనాల బాట పట్టాడు. విలాసవంతమైన జీవితం, బ్రాండెడ్ బట్టలు, పబ్‌లు-క్లబ్బులకు వెళ్లే అలవాటు ఉన్న అతడు.. ఆ ఖర్చులను తట్టుకునేందుకే రైళ్లలోని ఏసీ కోచ్‌లను ఎంచుకుని చోరీలకు దిగాడు. అతనిపై వివిధ పోలీస్ స్టేషన్లలో 27కు పైగా కేసులు పెండింగ్‌లో ఉండటం గమనార్హం.
పోలీసుల కంటపడకుండా ఉండేందుకు వీరు తరచూ తమ నివాస ప్రాంతాలను, జిల్లాలను మార్చేవారు. ఒక ప్రాంతంలో చోరీ చేయగానే వెంటనే వేరే జిల్లాకు వెళ్లిపోయి, అక్కడి నుంచి ఇతర రాష్ట్రాల రైళ్లను లక్ష్యంగా చేసుకునేవారు. దీంతో అంతర్రాష్ట్ర స్థాయిలో వీరి కదలికలను గుర్తించడం పోలీసులకు సవాలుగా మారింది. ప్రస్తుతం వీరు చేతివాటం ప్రదర్శించిన ఇతర రైళ్లు, నగరాల వివరాలపై లోతైన దర్యాప్తు కొనసాగుతోంది.