ఒక చిన్న సహాయం లేదా మనం చూపించే చిన్నపాటి ఆప్యాయత.. ఒక వ్యక్తి రోజంతటినీ అందంగా మార్చగలదని నిరూపించే హృదయాన్ని హత్తుకునే ఘటన ప్రస్తుతం సోషల్ మీడియాలో వైరల్ అవుతోంది.
ఉత్తరాఖండ్‌కు చెందిన అమన్ శర్మ అనే యువకుడు.. కుండపోతగా వర్షం కురుస్తున్న సమయంలో కేవలం చెప్పులు వేసుకుని ఫుడ్ డెలివరీ చేయడానికి వచ్చిన ఓ యువకుడికి తన కొత్త అడిడాస్ (Adidas) బ్రాండ్ షూస్‌ను బహుమతిగా ఇచ్చాడు.
ఈ ఘటనకు సంబంధించిన సీసీటీవీ వీడియోను అమన్ శర్మ తన ఇన్‌స్టాగ్రామ్ ఖాతాలో షేర్ చేశాడు.
వీడియో ప్రారంభంలో అమన్ శర్మ ఓ ముఖ్యమైన విషయాన్ని పేర్కొన్నాడు.
“ఈ షూస్ నా కంటే ఆ డెలివరీ బాయ్‌కే ఎక్కువ అవసరం” అని రాశాడు.
వీడియోలో.. అమన్ శర్మ తన ఇంటి బాల్కనీ నుంచి కింద నిలబడి ఉన్న డెలివరీ ఉద్యోగిని పిలిచి..
“అన్నా.. షూస్ కావాలా? ఒరిజినల్ అడిడాస్ బ్రాండ్!” అంటూ అడిగి, తన షూస్‌ను చూపించాడు.
ఆ తర్వాత కిందకు వెళ్లి ఆ షూస్‌ను ఆ యువకుడికి బహుమతిగా ఇచ్చాడు. షూస్ అందుకున్న డెలివరీ ఉద్యోగి ఎంతో సంతోషంగా వాటిని తన సైకిల్‌పై పెట్టుకుని వెళ్లిన దృశ్యాలు కూడా వీడియోలో కనిపించాయి.
ఆ యువకుడు జెప్టో (Zepto) సంస్థకు చెందిన డెలివరీ పార్ట్‌నర్ అని తెలిసింది.
ఆ రోజు భారీ వర్షంలో అతను పూర్తిగా తడిసిపోయాడు. కనీసం సరైన రెయిన్‌కోట్ కూడా అతని వద్ద లేదు. అయినప్పటికీ వర్షాన్ని లెక్కచేయకుండా సైకిల్‌పై వెళ్లి.. కస్టమర్‌కు ఆర్డర్‌ను సమయానికి అందించి తిరిగి వచ్చాడు.
అతని కాళ్లకు కేవలం సాధారణ చెప్పులు మాత్రమే ఉండటాన్ని అమన్ శర్మ గమనించాడు. దీంతో తన కాళ్లకు ఉన్న కొత్త షూస్‌ను వెంటనే తీసి అతనికి ఇవ్వాలని నిర్ణయించుకున్నాడు.
అయితే, ఈ వీడియో సోషల్ మీడియాలో భిన్నమైన స్పందనలు తెచ్చుకుంది. చాలామంది అమన్ శర్మ చూపించిన మానవత్వాన్ని ప్రశంసించగా.. మరికొందరు “ఇలాంటి పనులు కేవలం ప్రచారం, పేరు కోసం చేస్తున్నారు” అంటూ విమర్శించారు.
ఈ విమర్శలకు స్పందించిన అమన్ శర్మ..
“ఇది మా దృష్టిని ఆకర్షించడానికి లేదా ప్రచారం కోసం చేసిన పని కాదు. ఆ సమయంలో నా మనసుకు ఏది సరైనదిగా అనిపించిందో.. అదే చేశాను. ఒక చిన్న సహాయం కూడా మరొకరి జీవితంలో పెద్ద మార్పును తీసుకురాగలదని నేను నమ్ముతున్నాను” అని చెప్పాడు.
ఈ ఘటనకు సంబంధించిన వీడియో ప్రస్తుతం సోషల్ మీడియాలో వైరల్‌గా మారింది.
Leave a Reply