నడిరోడ్డుపై కుప్పకూలిన ట్రాఫిక్ సిగ్నల్ స్తంభం! త్రుటిలో ప్రాణాలతో బయటపడ్డ బాలుడు, స్కూటర్ డ్రైవర్.. తుప్పు పట్టడం వల్లే కూలిందా? గుండె ఝల్లుమనిపించే వీడియో!

దేశ రాజధాని ఢిల్లీలోని కన్నాట్ ప్లేస్ ఎప్పుడూ రద్దీగా, వాహనాల రాకపోకలతో బిజీగా ఉండే ప్రాంతం. ఆ ప్రాంతంలోని ఔటర్ సర్కిల్‌లో యథావిధిగా వాహనాలు వెళ్తున్న సమయంలో ఊహించని ప్రమాదం చోటుచేసుకుంది.

రోడ్డు పక్కన ఉన్న ట్రాఫిక్ సిగ్నల్ విద్యుత్ స్తంభం ఒక్కసారిగా బ్యాలెన్స్ తప్పి, భారీ శబ్దంతో నడిరోడ్డుపై కుప్పకూలింది. సరిగ్గా అదే సమయంలో అటుగా వెళ్తున్న ఒక ఆటో రిక్షా, ఒక స్కూటర్‌పై ఆ భారీ స్తంభం పడింది. రెప్పపాటు కాలంలో జరిగిన ఈ ఘటనతో స్థానికులు తీవ్ర భయాందోళనలకు గురయ్యారు. ప్రమాదాన్ని చూసిన ప్రజలు కేకలు వేస్తూ ఘటనా స్థలానికి పరుగులు తీశారు.

ఈ ప్రమాదంలో స్కూటర్ నడుపుతున్న వ్యక్తితో పాటు ఆటోలో ప్రయాణిస్తున్న ఒక చిన్నారికి గాయాలయ్యాయి. స్థానికులు వెంటనే వారిని రక్షించి ఆస్పత్రికి తరలించారు. అదృష్టవశాత్తూ ఎలాంటి ప్రాణనష్టం జరగకపోవడంతో అందరూ ఊపిరి పీల్చుకున్నారు.

సిగ్నల్ స్తంభం అకస్మాత్తుగా కూలిపోవడానికి గల అసలు కారణంపై ప్రస్తుతం దర్యాప్తు జరుగుతోంది. అయితే, చాలా కాలంగా సరైన నిర్వహణ లేక ఆ స్తంభం తుప్పు పట్టిపోవడం వల్లే ఈ ప్రమాదం జరిగిందని స్థానికులు ఆగ్రహం వ్యక్తం చేస్తున్నారు.