చేయి అందించి గుట్టుచప్పుడు కాకుండా తప్పుకున్న పాకిస్థాన్! “ఎర్ర సముద్రంలో ఆధిపత్యం చాటుకున్న హౌతీలు”. ఈజిప్టుతో చేతులు కలుపుతున్న సౌదీ? మధ్యప్రాచ్యంలో రసవత్తరంగా మారిన రాజకీయ చదరంగం!

యెమెన్‌లోని పశ్చిమ తీర ప్రాంతాలు, ప్రపంచ వాణిజ్యానికి అత్యంత కీలకమైన బాబ్ అల్-మందెబ్ జలసంధి చుట్టూ హౌతీ తిరుగుబాటుదారుల కార్యకలాపాలు పెరగడంతో మధ్యప్రాచ్యంలో ఉద్రిక్తతలు నెలకొన్నాయి.

ఈ పరిస్థితిని ఎదుర్కొనేందుకు సౌదీ అరేబియా దౌత్యపరమైన చర్యలను ముమ్మరం చేసింది. సౌదీ అరేబియాలోని తూర్పు ప్రాంతాల్లో ఉన్న చమురు ఉత్పత్తి కేంద్రాల నుంచి ఎర్ర సముద్రంలోని యన్బు పోర్టు వరకు సుమారు 1,200 కిలోమీటర్ల పొడవైన చమురు పైప్‌లైన్ వ్యవస్థ ఉంది.

ప్రస్తుతం హార్ముజ్ జలసంధి చుట్టూ ఉద్రిక్త పరిస్థితులు కొనసాగుతున్న నేపథ్యంలో.. సౌదీ అరేబియా ముడి చమురు ఎగుమతులకు ఎర్ర సముద్రం, బాబ్ అల్-మందెబ్ మార్గాలు కీలకంగా మారాయి. అలాగే సూయజ్ కాలువ ద్వారా యూరప్, ఆసియా, మధ్యప్రాచ్య దేశాలకు వెళ్లే వాణిజ్య నౌకలకు కూడా ఈ సముద్ర మార్గం ఎంతో ముఖ్యమైనది.

హౌతీల నుంచి వస్తున్న వరుస బెదిరింపులను ఎదుర్కొనేందుకు సౌదీ అరేబియా గతంలోనే పలు దేశాల సహాయాన్ని కోరింది. అయితే ప్రస్తుత పరిస్థితుల నేపథ్యంలో సౌదీ క్రౌన్ ప్రిన్స్ మహ్మద్ బిన్ సల్మాన్ ఈజిప్టు పర్యటనకు వెళ్లి.. ఆ దేశ అధ్యక్షుడు అబ్దెల్ ఫత్తా అల్-సిసీతో సమావేశమయ్యారు.

ఈ సమావేశంలో సముద్ర మార్గాల్లో నౌకాయానం భద్రత, స్వేచ్ఛను కాపాడేందుకు ఇరు దేశాలు తమ నిబద్ధతను వ్యక్తం చేసినట్లు సమాచారం.

అలాగే సౌదీ అరేబియా భద్రత, స్థిరత్వాన్ని కాపాడేందుకు తీసుకునే చర్యలకు ఈజిప్టు పూర్తి మద్దతు ఇస్తుందని ఆ దేశ ప్రభుత్వం స్పష్టం చేసినట్లు వార్తలు పేర్కొంటున్నాయి.

మధ్యప్రాచ్యంలో సముద్ర మార్గాల భద్రత, చమురు రవాణా, ప్రాంతీయ రాజకీయాల నేపథ్యంలో సౌదీ అరేబియా–ఈజిప్టు మధ్య ఈ తాజా చర్చలు ప్రాధాన్యత సంతరించుకున్నాయి.