భారతీయుల పండుగ వేడుకలు అనగానే.. అందులో రకరకాల స్వీట్లకు ఎప్పుడూ ప్రత్యేక స్థానం ఉంటుంది.
ముఖ్యంగా వినాయక చవితి, దీపావళి వంటి పండుగలు వచ్చాయంటే.. బంధువులు, స్నేహితులతో స్వీట్లు పంచుకుని ఆనందించడం మన సంస్కృతిలో భాగంగా మారిపోయింది.
ఈ నేపథ్యంలో ప్రముఖ ఫుడ్ డెలివరీ యాప్ స్విగ్గీ.. ఇటీవల పండుగ సీజన్‌లో ప్రజలు ఎలాంటి స్వీట్లను ఎక్కువగా ఆర్డర్ చేశారనే దానిపై ఆసక్తికరమైన వివరాలను వెల్లడించింది.
ఈ డేటా భారతీయుల పండుగల సమయంలో ఆహార అభిరుచులను, ముఖ్యంగా స్వీట్లపై వారికి ఉన్న ఆసక్తిని స్పష్టంగా చూపిస్తోంది.
ఈ వివరాల్లో అందరినీ ఆశ్చర్యపరిచిన విషయం ఏమిటంటే.. వినాయక చవితి సందర్భంగా ఒకే వ్యక్తి ఏకంగా 144 మోదకాలను ఆర్డర్ చేశాడు.
దీని కోసం అతను రూ.29,693 ఖర్చు చేసినట్లు స్విగ్గీ వెల్లడించింది.
అదేవిధంగా.. పండుగల సమయంలో ఎంతో ఇష్టపడే జీడిపప్పు స్వీట్ కాజు కట్లీకి కూడా భారీ డిమాండ్ కనిపించింది. ఒక కస్టమర్ ఒకే ఆర్డర్‌లో సుమారు రూ.15,406 విలువైన కాజు కట్లీని కొనుగోలు చేసినట్లు సమాచారం.
మోదకం, కాజు కట్లీ వంటి సంప్రదాయ స్వీట్లకు ఇప్పటికీ పండుగల సమయంలో ఎంతటి ఆదరణ ఉందో ఈ భారీ ఆర్డర్లు తెలియజేస్తున్నాయి.
డిజిటల్ యుగంలో ప్రజల పండుగల వేడుకల్లో ఎన్నో మార్పులు వచ్చినప్పటికీ.. పండుగలతో ముడిపడిన సంప్రదాయ రుచులు, స్వీట్లు పంచుకునే ఆప్యాయత మాత్రం అలాగే కొనసాగుతున్నాయి.
గతంలో స్వీట్లు కొనుగోలు చేసేందుకు దుకాణాలకు వెళ్లి గంటల తరబడి క్యూలో నిలబడాల్సి వచ్చేది. ఇప్పుడు మాత్రం ఆన్‌లైన్ ఫుడ్ డెలివరీ యాప్‌ల ద్వారా తమకు కావాల్సిన స్వీట్లను నేరుగా ఇంటి వద్దకే తెప్పించుకుంటున్నారు.
పెద్ద మొత్తంలో స్వీట్లు ఆర్డర్ చేసి కుటుంబ సభ్యులు, బంధువులతో కలిసి పండుగను జరుపుకోవడం.. భారతీయుల పండుగలపై ఉన్న ఆసక్తిని మరోసారి చాటిచెప్పింది.
Leave a Reply