బీహార్‌లోని సమస్తిపూర్ జిల్లాలో దారుణ ఘటన చోటుచేసుకుంది. మద్యం తాగేందుకు డబ్బులు కావాలని తల్లిదండ్రులతో గొడవపడిన ఓ యువకుడు.. ఆగ్రహంతో తండ్రిపై గొడ్డలి, పారతో దాడి చేసినట్లు ఆరోపణలు ఉన్నాయి. ఈ ఘటనలో తండ్రి మృతి చెందగా.. తల్లి కూడా తీవ్రంగా గాయపడింది.
మోహన్‌పూర్ మున్సిపల్ పరిధిలో ఈ ఘటన జరిగినట్లు సమాచారం. మృతుడిని 55 ఏళ్ల మహ్మద్ ఇస్లాంగా, గాయపడిన మహిళను ఆయన భార్య మోమినా ఖాతూన్గా పోలీసులు గుర్తించారు.
వారి 20 ఏళ్ల కుమారుడు మహ్మద్ అర్మాన్ ఈ దాడికి పాల్పడినట్లు ఆరోపణలు వచ్చాయి. అర్మాన్‌కు మద్యం సేవించే అలవాటు ఉందని, మానసిక ఆరోగ్య సమస్యలు ఉన్నట్లు కూడా కుటుంబ సభ్యులు తెలిపినట్లు కథనం పేర్కొంది.
కథనం ప్రకారం.. మద్యం కోసం అర్మాన్ తన తల్లిదండ్రులను డబ్బులు అడిగాడు. వారు రూ.50 మాత్రమే ఇచ్చారని, దీంతో ఆగ్రహించిన అతడు ఇంట్లో ఉన్న పార, గొడ్డలితో తల్లిదండ్రులపై వరుసగా దాడి చేసినట్లు ఆరోపణలు ఉన్నాయి.
తీవ్రంగా గాయపడిన మహ్మద్ ఇస్లాంను కుటుంబ సభ్యులు, స్థానికుల సహాయంతో సదర్ ఆసుపత్రికి తరలించారు. అక్కడ ప్రాథమిక చికిత్స అనంతరం మెరుగైన వైద్యం కోసం పాట్నాలోని ఆసుపత్రికి తరలిస్తుండగా.. మార్గమధ్యంలోనే ఆయన మృతి చెందారు.
మరోవైపు.. ఈ దాడిలో గాయపడిన మోమినా ఖాతూన్‌కు ఆసుపత్రిలో చికిత్స కొనసాగుతోంది.
సమాచారం అందుకున్న పోలీసులు ఘటనాస్థలానికి చేరుకుని దర్యాప్తు ప్రారంభించారు. ఫోరెన్సిక్ సైన్స్ ల్యాబొరేటరీ బృందం కూడా అక్కడికి చేరుకుని ఆధారాలను సేకరించింది.
ఈ కేసులో మహ్మద్ అర్మాన్‌ను అరెస్ట్ చేసినట్లు సదర్ ఎస్‌డీఓపీ-1 దుర్గేష్ దీపక్ తెలిపారు. ఘటనకు దారితీసిన అసలు కారణాలపై దర్యాప్తు కొనసాగుతోందని పోలీసులు వెల్లడించారు.
మద్యం కోసం డబ్బులు ఇవ్వలేదన్న కోపంతోనే ఈ దాడి జరిగిందా? లేక ఘటనకు మరేదైనా కారణం ఉందా? అనే కోణాల్లో పోలీసులు విచారణ చేస్తున్నారు.
Leave a Reply