గుజరాత్‌లోని అమ్రేలి జిల్లాలో పోలీసులనే నిశ్చేష్టులను చేసిన ఒక ఘోర దుర్ఘటన చోటుచేసుకుంది.
నిర్మాణ రంగంలో సూపర్‌వైజర్‌గా పనిచేస్తున్న 40 ఏళ్ల కిషోర్ ధనక్, తన 5 ఏళ్ల కుమార్తె హిమాన్షిని హత్య చేసి, ఆ తర్వాత తాను కూడా ఆత్మహత్య చేసుకున్నాడు. బెలూన్లు, కొవ్వొత్తులతో కోలాహలంగా అలంకరించిన ఒక గదిలో ఈ తీవ్ర విషాద సంఘటన జరిగింది.
ఈ ఘటన జరిగిన సమయంలో కిషోర్ భార్య మంజుబెన్ తన పుట్టింటికి వెళ్లింది. భర్తకు ఫోన్ చేసినా స్పందించకపోవడంతో, మంజుబెన్ తన సోదరుడిని ఇంటికి వెళ్లి చూడాల్సిందిగా కోరింది. అతడు అక్కడికి వెళ్లి తలుపులు బద్దలుగొట్టి లోపలికి వెళ్లగా ఈ గుండెలు పిండేసే నిజం వెలుగులోకి వచ్చింది. పోలీసులు జరిపిన విచారణలో కిషోర్ తాను తీసుకున్న వ్యక్తిగత రుణా (Personal Loan)న్ని తన నిర్మాణ వ్యాపారంలో పెట్టుబడి పెట్టినట్లు తేలింది. వ్యాపార భాగస్వాముల నుంచి రావలసిన రూ. 7.25 లక్షల బకాయిలు అందకపోవడంతో తీవ్ర ఆర్థిక సంక్షోభంలో కూరుకుపోయాడు.
బెడ్‌పై మూడు సూసైడ్ నోట్లు లభ్యమయ్యాయి. తాను చనిపోయిన తర్వాత తన కూతురు కష్టపడకూడదనే ఉద్దేశంతోనే ఆమె ప్రాణాలు తీసినట్లు అందులో పేర్కొన్నాడు. ఈ ఘటనలో పోలీసులను తీవ్రంగా అయోమయానికి గురిచేసింది ఆ గది వింత అలంకరణ, అలాగే ఆ తండ్రి చేసిన చర్యలే! గది అంతా బెలూన్లు, కొవ్వొత్తులతో అలంకరించి ఉంది. కూతురు హిమాన్షికి తెల్లటి దుస్తులు తొడిగి, ఆమె తలపై దుపట్టా ఉంచాడు. అంతేకాకుండా ఆమె పెదవులపై తులసి ఆకులను ఉంచాడు.
కూతురి మృతదేహాన్ని ఒక ఫ్రిజ్‌లో కుషన్ల మధ్య ఉంచి మూసివేశాడు. ఆమెకు ఇష్టమైన చాక్లెట్లను గదిలోనూ, ఫ్రిజ్ లోపల కూడా ఉంచాడు. ఆ రోజు చిన్నారి పుట్టినరోజు కాకపోయినప్పటికీ, ఫ్రిజ్ పై ‘హ్యాపీ బర్త్‌డే హిమాన్షి’ అని రాసిన కాగితం లభించింది. దీని ఆధారంగా తన కూతురి చివరి ప్రయాణాన్ని ఒక పుట్టినరోజు వేడుకలా మార్చడానికి ఆ తండ్రి ప్లాన్ చేసి ఉండవచ్చని పోలీసులు భావిస్తున్నారు.
బయట పుట్టినరోజు వేడుకలాగా ఆడంబరమైన అలంకరణ, లోపల తండ్రీకూతుళ్లు శవాలై పడి ఉన్న ఘోర దృశ్యం ఆ ప్రాంత ప్రజలను తీవ్ర శోకసంద్రంలో ముంచెత్తింది.
Leave a Reply