ఉత్తరప్రదేశ్‌లోని ఫిరోజాబాద్ మెడికల్ కాలేజీ ప్రభుత్వ ఆస్పత్రిలో ఊహించని ఘటన చోటుచేసుకుంది. పాము కాటుకు గురైన ఓ వ్యక్తి చికిత్స కోసం ఆస్పత్రికి వచ్చాడు. అయితే, అతడు తనను కాటేసిన పామును కూడా పట్టుకుని ఓ ప్లాస్టిక్ బాక్స్‌లో పెట్టుకుని ఆస్పత్రికి తీసుకురావడంతో అక్కడ ఒక్కసారిగా తీవ్ర కలకలం రేగింది.
జరౌలి కలా గ్రామానికి చెందిన వసీం అనే పాములు పట్టే వ్యక్తిని ఓ పాము కాటేసినట్లు సమాచారం. దీంతో ఆ పామును పట్టుకున్న వసీం.. దాన్ని ప్లాస్టిక్ బాక్స్‌లో బంధించి చికిత్స కోసం ఆస్పత్రికి వచ్చాడు.
వైద్యులు అతడికి చికిత్స అందిస్తున్న సమయంలో అనుకోకుండా బాక్స్ మూత తెరుచుకుంది. దీంతో అందులో ఉన్న పాము ఒక్కసారిగా బయటకు వచ్చి ఆస్పత్రి వార్డులోకి జారుకుంది.
వార్డులో పాము కనిపించడంతో రోగులు, వారి బంధువులు, ఆస్పత్రి సిబ్బంది భయంతో పరుగులు తీశారు. కొందరు రోగులు తమ బెడ్ల నుంచి లేచి సురక్షిత ప్రాంతాలకు వెళ్లారు. దీంతో ఆస్పత్రి ప్రాంగణంలో కొంతసేపు గందరగోళ పరిస్థితి నెలకొంది.
వెంటనే అటవీశాఖ అధికారులకు సమాచారం అందించారు. వారు ఆస్పత్రికి చేరుకుని పాము కోసం విస్తృతంగా గాలింపు చేపట్టారు.
వార్డులోని మూలమూలలు, బెడ్ల కింద తదితర ప్రాంతాల్లో నాలుగు గంటలకు పైగా వెతికినా పాము ఆచూకీ మాత్రం లభించలేదని సమాచారం. అర్ధరాత్రి వరకు గాలింపు కొనసాగినా పాము కనిపించకపోవడంతో ఆస్పత్రి సిబ్బందిని అప్రమత్తంగా ఉండాలని అధికారులు సూచించారు.
పాము కాటుకు గురైన వ్యక్తి దాన్ని పట్టుకుని ఆస్పత్రికి తీసుకురావడం, ఆ తర్వాత అదే పాము ఆస్పత్రిలో తప్పించుకోవడంతో జరిగిన ఈ ఘటన ప్రస్తుతం చర్చనీయాంశంగా మారింది.
పాము లేదా ఇతర విషపూరిత జీవులు కనిపించినప్పుడు వాటిని స్వయంగా పట్టుకునేందుకు ప్రయత్నించకుండా, నిపుణులు లేదా సంబంధిత అధికారులకు సమాచారం అందించాలని నిపుణులు సూచిస్తున్నారు.
Leave a Reply