మహారాష్ట్రలోని సతారా జిల్లాలో ఇసుక అక్రమ రవాణాను అడ్డుకునేందుకు ప్రయత్నించిన ఓ పోలీసును డంపర్ వాహనంతో సుమారు కిలోమీటరు దూరం ఈడ్చుకెళ్లిన ఘటన తీవ్ర దిగ్భ్రాంతిని కలిగించింది.
ఆదివారం సాయంత్రం పెట్రోలింగ్ విధుల్లో ఉన్న మహావీర్ గోక్రే అనే పోలీసు, నంబర్ ప్లేట్ లేకుండా వెళ్తున్న ఒక డంపర్‌ను అనుమానంతో ఆపేందుకు ప్రయత్నించాడు.
డంపర్‌ను ఆపిన పోలీసు, అందులో అక్రమంగా ఇసుకను తరలిస్తున్నట్లు గుర్తించి, దానికి సంబంధించిన అనుమతి పత్రాల (లైసెన్స్) గురించి అడిగాడు. దీంతో డ్రైవర్‌కు, పోలీసుకి మధ్య వాగ్వాదం జరిగినట్లు తెలుస్తోంది. ఆ తర్వాత డ్రైవర్ అకస్మాత్తుగా డంపర్‌ను స్టార్ట్ చేసి అక్కడి నుంచి పారిపోయేందుకు ప్రయత్నించాడు.
ఈ క్రమంలో డంపర్‌ను ఆపేందుకు ప్రయత్నించిన మహావీర్ గోక్రే, వాహనం తలుపును లేదా పక్క భాగాన్ని గట్టిగా పట్టుకున్నాడు. కానీ డ్రైవర్ వాహనాన్ని ఆపకుండా వేగంగా నడపడంతో, సదరు పోలీసును సుమారు ఒక కిలోమీటరు దూరం పాటు అలాగే ఈడ్చుకెళ్లినట్లు పోలీసులు తెలిపారు.
ఈ ఘటనలో తీవ్రంగా గాయపడిన పోలీసు మహావీర్ గోక్రేను వెంటనే ఆస్పత్రికి తరలించి చికిత్స అందిస్తున్నారు. ఆయన ఇచ్చిన వాంగ్మూలం ఆధారంగా కేసు నమోదు చేసిన పోలీసులు, ఈ ఘటనతో సంబంధం ఉన్న ఇద్దరిని అరెస్టు చేశారు. అలాగే ఇసుక అక్రమ రవాణా వెనుక ఉన్నది ఎవరు, ఆ డంపర్ యజమాని ఎవరు అనే కోణంలో దర్యాప్తు ముమ్మరంగా కొనసాగుతోంది.
Leave a Reply