ఉత్తరప్రదేశ్ రాష్ట్రంలో, ఇంట్లో అమంగళకరమైన లేదా అమానుష శక్తులు ఉన్నాయని నమ్మిన బబితా సింగ్ అనే మహిళ దెయ్యాన్ని వెళ్లగొట్టడం కోసం పక్క గ్రామానికి చెందిన ఇద్దరు పూజారులను ఇంటికి పిలిపించింది.
పూజారులు ఇద్దరూ సాయంత్రం వచ్చి పూజలు చేయడం ప్రారంభించారు.
ఆ సమయంలో ఇంటికి వచ్చిన బబిత భర్త అరవింద్ సింగ్, పూజల గురించి ప్రశ్నించడమే కాకుండా పూజారుల గుర్తింపు కార్డులు (ఐడీ కార్లు) చూపించాలని నిలదీశాడు. దీంతో ఇరువర్గాల మధ్య తీవ్ర వాగ్వాదం చోటుచేసుకుంది. ఇందులో తీవ్ర ఆగ్రహానికి గురైన అరవింద్ సింగ్, తన వద్ద ఉన్న లైసెన్స్ ఉన్న తుపాకీని తీసి భార్యను, ఆ ఇద్దరు పూజారులను కాల్చిచంపాడు.
ముగ్గురూ సంఘటనా స్థలంలోనే రక్తం మడుగులో ప్రాణాలు కోల్పోగా, తుపాకీ శబ్దాలు విని చుట్టుపక్కల ప్రజలు పరుగెత్తుకొచ్చారు. వెంటనే అరవింద్ సింగ్ తన ముగ్గురు పిల్లలను ఇంట్లోకి లాక్కెళ్లి తలుపులు వేసుకున్నాడు. సమాచారం అందుకుని వచ్చిన పోలీసులు చర్చలు జరిపేందుకు ప్రయత్నించగా, పిల్లలను కూడా చంపేస్తానని అరవింద్ సింగ్ బెదిరించడంతో దాదాపు 8 పోలీస్ స్టేషన్ల నుంచి స్పెషల్ ఫోర్స్ (అదనపు బలగాలు) రప్పించారు.
అర్ధరాత్రి వరకు పోలీసులు ఎంత నచ్చజెప్పినా వినకుండా, అరవింద్ సింగ్ పోలీసులపైకే విచక్షణారహితంగా కాల్పులు జరిపాడు. ఈ కాల్పుల్లో ఒక చిన్నారి తీవ్రంగా గాయపడింది. పరిస్థితి చేయి దాటిపోవడంతో, ఎస్‌ఎస్‌పీ కుమార్ నాయకత్వంలో పోలీసులు ఇంట్లోకి టియర్ గ్యాస్ (కన్నీటి వాయు) గోళాలను విసిరి, తలుపులు బద్దలుగొట్టుకుని లోపలికి ప్రవేశించి ఎదురుకాల్పులు జరిపారు.
ఈ ఎన్‌కౌంటర్‌లో అరవింద్ సింగ్ తీవ్రంగా గాయపడగా, అతని బంధీ నుంచి ముగ్గురు పిల్లలను సురక్షితంగా రక్షించి ఆసుపత్రికి తరలించారు. అక్కడ చికిత్స పొందుతూ అరవింద్ సింగ్ మృతి చెందాడు. దెయ్యాలను వెళ్లగొట్టే పూజతో మొదలైన ఈ విపరీతం, నలుగురి ప్రాణాలను బలిగొని ఎన్‌కౌంటర్‌తో ముగియడం ఆ ప్రాంతంలో తీవ్ర కలకలం రేపింది.
Leave a Reply