రాష్ట్రపతి ద్రౌపది ముర్ము వద్ద మాజీ ఏడీసీ (ADC – Aide-de-Camp) గా పనిచేసిన మేజర్ రిషబ్ సింగ్, తన 30వ ఏట అకస్మాత్తుగా పదవికి రాజీనామా చేయడంపై మనసు విప్పి మాట్లాడారు. దేశం కోసం పన్నెండేళ్ల పాటు ఎంతో గర్వంగా సేవలందించినప్పటికీ.. తన తల్లిదండ్రుల పట్ల ఉన్న బాధ్యతలను, కుటుంబ విధులను విస్మరించలేక ఒకానొక దశలో ఈ కఠినమైన వ్యక్తిగత నిర్ణయం తీసుకోవాల్సి వచ్చిందని ఆయన పేర్కొన్నారు.
ముఖ్యంగా, ఈ హోదాలో (ADC) ఉన్నవారు వివాహం చేసుకోకూడదనే నిబంధన ఉండటంతో ఇది అతిపెద్ద త్యాగమని, ఈ ఉన్నత బాధ్యత కోసం తన యవ్వనాన్ని, వ్యక్తిగత జీవితాన్ని కోల్పోయానని ఆయన భావోద్వేగంగా తెలిపారు.
సైనిక భద్రతా విధుల్లో ఉండే జవాన్లకు కూడా భయం కలగడం సహజమేనని స్పష్టం చేసిన ఆయన.. రాష్ట్రపతి భద్రతా అధికారిగా ఉన్నంత మాత్రాన భయం ఉండదని అర్థం కాదని అన్నారు. అయితే, భయం కలిగే ఆ క్షణాల్లో ఏం తప్పు జరుగుతుందో అని ఆలోచించడం కంటే, ఆ పరిస్థితిని ఎలా ఎదుర్కొని చక్కదిద్దాలనే దానిపైనే తమకు కఠినమైన శిక్షణ ఇస్తారని ఆయన వివరించారు.
దేశ అత్యున్నత భద్రతా విభాగంలో తన యవ్వనాన్ని ధారపోసిన ఓ అధికారి, కుటుంబ బాధ్యతల కోసం తన పదవికి రాజీనామా చేసిన ఈ వార్త ప్రస్తుతం సోషల్ మీడియాలో పెద్ద చర్చనీయాంశంగా మారింది. సైనికుల వ్యక్తిగత జీవిత త్యాగాలు, వారి అంకితభావంపై పలువురు ప్రశంసలు కురిపిస్తుండగా, ఈ ఇంటర్వ్యూ ప్రస్తుతం నెట్టింట తెగ వైరల్ అవుతోంది.
Leave a Reply