“యుద్ధం ముగింపునకు ఇరాన్ పెట్టిన 5 షరతులు..! హోర్ముజ్ జలసంధిని తెరిచేందుకూ సిద్ధమని సమాచారం.. అమెరికా ముందు ఉంచిన డిమాండ్లు ఏంటి.?”

అమెరికా, ఇరాన్ మధ్య కొనసాగుతున్న ఘర్షణకు ముగింపు పలికేందుకు చర్చలు మళ్లీ ప్రారంభమైన నేపథ్యంలో, ఇరాన్ తమ షరతులను అమెరికాకు తెలియజేసినట్లు సమాచారం వెలువడింది.

ఖతార్ మధ్యవర్తిత్వంతో న్యూయార్క్‌లో ఇరుపక్షాల ప్రతినిధుల మధ్య చర్చలు జరిగినట్లు తెలుస్తోంది. హోర్ముజ్ జలసంధిని (Strait of Hormuz) పూర్తిగా తెరిచే విషయమై కూడా ఇరాన్ పలు షరతులను ముందుంచింది.

ఇరాన్ ముందుంచిన 5 ప్రధాన డిమాండ్లలో, పశ్చిమాసియా (మిడిల్ ఈస్ట్) లోని అన్ని వేదికలపై యుద్ధానికి ముగింపు పలకాలనేది ఒకటి. ముఖ్యంగా లెబనాన్, యెమెన్‌లకు సంబంధించిన సైనిక చర్యలను కూడా నిలిపివేయాలని ఇరాన్ స్పష్టం చేసినట్లు సమాచారం. అమెరికా తన సైనిక చర్యలను ఆపడమే కాకుండా, భవిష్యత్తులో ఒప్పందాన్ని ఉల్లంఘించబోమని హామీ ఇవ్వాలని కూడా డిమాండ్ చేసినట్లు తెలుస్తోంది.

అంతేకాకుండా, ఇరాన్‌పై కొనసాగుతున్న నౌకాదళ దిగ్బంధనాన్ని ముగించాలని, ఆర్థిక ఆంక్షలను ఎత్తివేయాలని, విదేశాల్లో స్తంభింపజేసిన ఇరాన్ నిధులను విడుదల చేయాలని కూడా ఆ డిమాండ్లలో పేర్కొన్నట్లు వార్తా కథనాలు చెబుతున్నాయి. ఈ డిమాండ్లపై ఇరాన్ గతంలోనూ పట్టుబట్టినప్పటికీ, ఐక్యరాజ్యసమితి సర్వసభ్య సమావేశాల నేపథ్యంలో మళ్లీ చర్చలు జరుగుతున్నాయి.

మరోవైపు, అమెరికా సైనిక ఒత్తిడిని తగ్గించి, ఇరాన్ ఓడరేవులపై విధించిన దిగ్బంధనాన్ని తొలగిస్తే.. 7 రోజుల్లోగా హోర్ముజ్ జలసంధిని తిరిగి తెరిచేందుకు సిద్ధంగా ఉన్నట్లు ఇరాన్‌కు చెందిన ఓ సీనియర్ అధికారి ‘రాయిటర్స్’ (Reuters) వార్తా సంస్థకు తెలిపారు. దీంతో కాల్పుల విరమణ, హోర్ముజ్ జలసంధికి సంబంధించిన తదుపరి విడత చర్చలు అత్యంత ప్రాధాన్యత సంతరించుకున్నాయి.