“దేశాన్నే కుదిపేసిన వ్యాపారవేత్త హత్య కేసులో ఊహించని మలుపు”.. కోడలు అమాయకురాలు.. కొడుకే యముడు.. రూ.40 లక్షల అప్పు, జూదం వ్యసనం.. తండ్రి మరో పెళ్లి చేసుకుంటే ఆస్తి పోతుందనే భయం.? సంచలన వాంగ్మూలం..!

ఉత్తరప్రదేశ్ రాష్ట్రం కాన్పూర్‌లో జరిగిన ఓ కోటీశ్వరుడైన ఫార్మా (మందుల) వ్యాపారి హత్య కేసు, ప్రస్తుతం దేశవ్యాప్తంగా ప్రజలను భయాందోళనకు గురిచేస్తోంది.

కన్న కొడుకే తన తండ్రి ఆస్తి కోసం రచించిన హత్య కుట్ర గురించి పోలీసులు వెల్లడించిన విషయాలు, ఓ సినిమా కథ కంటే భయంకరంగా ఉన్నాయి. కోట్లలో వ్యాపారం చేసే మందుల వ్యాపారి విమీత్ మినోచా ఒకరోజు అనుమానాస్పద రీతిలో హత్యకు గురయ్యారు. ఈ కేసును దర్యాప్తు చేసిన కాన్పూర్ పోలీసులు, తొలుత కొన్ని ఆధారాలతో వివిధ కోణాల్లో విచారణ జరిపారు. చివరకు పోలీసులు వెల్లడించిన సమాచారం అందరినీ నివ్వెరపరిచింది. తండ్రిని చంపడానికి బయటి వ్యక్తుల ప్రమేయం ఏమీ లేదని, ఆయన సొంత రక్తమైన ఒక్కగానొక్క కొడుకే ఈ దారుణానికి ప్రధాన సూత్రధారి అని తేలింది.

తండ్రి విమీత్ మినోచాను కంటికి రెప్పలా కాపాడుకోవాల్సిన కొడుకు సుప్రుత్ మినోచా.. మద్యపానం, జూదం, బెట్టింగ్‌ల వంటి అనేక దురలవాట్లకు బానిసయ్యాడు. సమాజంలో తన హోదాను ప్రదర్శించుకోవడానికి, విలాసవంతమైన జీవితాన్ని గడపడానికి వివిధ బ్యాంకుల నుంచి సుమారు రూ. 40 లక్షల వరకు అప్పులు చేశాడు. ఈ అప్పుకు గాను ప్రతి నెలా రూ. 55 వేలు ఈఎంఐ (EMI) కట్టాల్సిన పరిస్థితి ఏర్పడింది.

తండ్రి విమీత్ మినోచా ఖర్చుల కోసం ప్రతి నెలా సుమారు రూ. 40 వేలు ఇస్తున్నప్పటికీ, అది సుప్రుత్ విలాసాలకు ఏమాత్రం సరిపోయేది కాదు. సుప్రుత్ భార్య షాలు సైతం తన పుట్టింటి నుంచి రూ. 14 లక్షలు తీసుకువచ్చి భర్త అప్పులు తీర్చడానికి సహాయపడింది. అయినప్పటికీ, సుప్రుత్ డబ్బు దాహం, అప్పుల భారం తీరలేదు.

విచారణలో సుప్రుత్ చెప్పిన విషయాలు పోలీసులనే విస్తుపోయేలా చేశాయి. తన తండ్రికి వేరే మహిళలతో సంబంధాలు ఉన్నాయని, ఆ కారణంగానే తన తల్లిదండ్రులు విడిపోయి ఉంటున్నారని సుప్రుత్ తెలిపాడు. అంతేకాకుండా, గోవాలో జరిగిన కొన్ని పార్టీలకు సంబంధించిన ఫోటోలను తండ్రి తనకు చూపించాడని, భవిష్యత్తులో తండ్రి మరో వివాహం చేసుకుంటే కుటుంబానికి చెందిన కోట్లాది రూపాయల ఆస్తి తనకు దక్కకుండా పోతుందేమోనన్న భయం, అనుమానం తనలో కలిగాయని అతడు అంగీకరించాడు. తండ్రి ఆస్తి చేజారిపోతుందనే ఈ దురాశే విమీత్ మినోచా హత్యకు దారితీసింది.

ఈ కేసులో కీలక మలుపుగా.. వ్యాపారి ఇంట్లో పనిచేసే విశాల్, అతడి స్నేహితుడు రాజ్ కిషోర్‌లను పోలీసులు అదుపులోకి తీసుకుని విచారించారు. ఆ సమయంలో విశాల్ ఇచ్చిన వాంగ్మూలం అసలు నిజాన్ని బయటపెట్టింది.

తండ్రిని హతమార్చేందుకు సుప్రుత్ తమకు రూ. 6 లక్షలు ఇస్తానని ఒప్పందం చేసుకున్నట్లు విశాల్ వెల్లడించాడు. అంతేకాకుండా, ఒకవేళ తాము పోలీసులకు దొరికిపోతే ఆ నేరం మొత్తాన్ని తన భార్య షాలుపై నెట్టేయాలని కూడా సుప్రుత్ కుట్రపూరితంగా ముందుగానే చెప్పాడని తెలిపాడు. ఈ షాకింగ్ సమాచారం ఆధారంగానే పోలీసుల దర్యాప్తు కొడుకు వైపు మళ్లింది.

బుధవారం నాడు షాలు, విశాల్, రాజ్ కిషోర్‌లను 24 గంటల పోలీస్ కస్టడీకి తీసుకున్న అధికారులు, అందరినీ ఎదురెదురుగా కూర్చోబెట్టి విచారించారు. ఆ సమయంలో భర్త పన్నిన ఈ ఘోరమైన కుట్రను తెలుసుకుని కుంగిపోయిన షాలు, తన భర్తే కావాలని తనను ఈ కేసులో ఇరికించేందుకు ప్రయత్నించాడని కన్నీరుమున్నీరైంది.

పోలీసుల లోతైన దర్యాప్తులో, ఈ హత్య కుట్రలో కోడలు షాలుకు ఎలాంటి ప్రత్యక్ష ప్రమేయం లేదని నిర్ధారణ అయింది. దీంతో ఆమెను ఈ కేసు నుంచి తప్పించి, అందుకు సంబంధించిన పిటిషన్‌ను కోర్టులో దాఖలు చేసేందుకు పోలీసులు సిద్ధమవుతున్నారు. కన్నతండ్రి ప్రాణాలు తీసిన కిరాతక కొడుకు సుప్రుత్‌ను పోలీసులు అరెస్ట్ చేసి చట్టం ముందు నిలబెట్టారు. డబ్బు పిచ్చి, ఆస్తి వ్యామోహం ఓ కుటుంబాన్ని ఎలా సర్వనాశనం చేశాయో ఈ విషాద ఘటన కళ్లకు కడుతోంది!