“నెలకు రూ.10 లక్షల ఇంటి అద్దెనా..?” న్యూయార్క్‌లో నివసిస్తున్న భారతీయ మహిళ బయటపెట్టిన షాకింగ్ నిజం.. కేవలం అద్దెకే రూ.1.14 కోట్లు పోతుందా..? నోరెళ్లబెడుతున్న నెటిజన్లు..!!

అమెరికాలోని న్యూయార్క్ నగరంలో నివసిస్తున్న ఖుషీ జైన్ అనే భారతీయ మహిళ, అక్కడి మాన్‌హాటన్ (Manhattan) ప్రాంతంలో ఇంటి అద్దెలు ఎంత భారీగా ఉన్నాయో వివరిస్తూ ఇంటర్నెట్‌లో పెద్ద చర్చకు తెరలేపారు.

అక్కడ రెండు బెడ్‌రూమ్‌ల (2BHK) ఇంటికి నెలకు 10,000 డాలర్లు (భారత కరెన్సీలో సుమారు రూ.10 లక్షలు) అద్దెగా చెల్లించాల్సి వస్తోందని ఆమె తెలిపారు. ఫైనాన్స్ సంబంధిత వీడియోలు చేసే ప్రముఖ కంటెంట్ క్రియేటర్ శరణ్ హెగ్డేతో జరిగిన ఇంటర్వ్యూలో ఆమె ఈ షాకింగ్ విషయాన్ని పంచుకున్నారు.

మాన్‌హాటన్ ప్రాంతంలో మంచి వసతులున్న ఇళ్ల కోసం వెతికినప్పుడు 10,000 డాలర్ల కంటే తక్కువకు ఇళ్లు దొరకకపోవడంతో, తాను మాన్‌హాటన్ వెలుపలికి మారాల్సి వచ్చిందని ఆమె చెప్పారు. బ్రూక్లిన్, క్వీన్స్ వంటి ఇతర ప్రాంతాల్లో అయితే 5,000 నుండి 6,000 డాలర్ల వరకు అద్దె ఉంటుందని ఆమె పేర్కొన్నారు.

ఇంటి అద్దె, ఇతర ఖర్చులతో కలిపి తమకు నెలకు సుమారు 10,000 డాలర్ల వరకు ఖర్చవుతుందని ఆ దంపతులు తెలిపారు. ఇది ఏడాదికి సుమారు రూ.95 లక్షల నుండి రూ.1.14 కోట్ల వరకు అవుతుందని శరణ్ హెగ్డే లెక్కగట్టి చెప్పారు. న్యూయార్క్ నగరంలో అద్దె ఖర్చులు నిజంగా ఊహించలేనంత ఎక్కువగా ఉన్నాయని ఆయన పేర్కొన్నారు.

ఈ వీడియో సోషల్ మీడియాలో వైరల్ కావడంతో నెటిజన్లు తమదైన శైలిలో స్పందిస్తున్నారు. గత ఆరేళ్లుగా న్యూయార్క్‌లో నివసిస్తున్నానని చెప్పిన ఒక వ్యక్తి.. మంచి వసతులున్న రెండు బెడ్‌రూమ్‌ల ఇళ్లు 5,000 నుండి 6,000 డాలర్లకే దొరుకుతాయని, 10,000 డాలర్లు అనేది కాస్త అతిశయోక్తి అని కామెంట్ చేశారు.

అదే సమయంలో మరొక యూజర్ స్పందిస్తూ.. “ఆమె చెప్పేది నిజమే, కానీ 10,000 డాలర్ల అద్దెను ఎవరూ ఒంటరిగా చెల్లించరు; స్నేహితులు లేదా భాగస్వామితో కలిసే కడతారు. అలా చెల్లించే వారి వార్షిక ఆదాయం 2 లక్షల డాలర్ల (200K Dollars) కంటే ఎక్కువే ఉంటుంది” అని పేర్కొన్నారు. అంతేకాకుండా, అమెరికా ఆదాయాన్ని, ఖర్చులను నేరుగా భారత రూపాయలతో పోల్చి చూడటం సరైనది కాదని మరికొందరు అభిప్రాయపడుతున్నారు.