తల్లి కళ్ల ముందే 3 ఏళ్ల చిన్నారిని ఢీకొట్టిన కారు! సుమారు 10 అడుగుల దూరం ఈడ్చుకెళ్లి.. ఆపకుండా పారిపోయిన డ్రైవర్.. గుండెలు పగిలే దృశ్యం!

రాజస్థాన్‌లోని జలోర్ జిల్లాలో స్కార్పియో కారు ఢీకొని 3 ఏళ్ల బాలుడు మృతి చెందిన ఘటన తీవ్ర విషాదాన్ని నింపింది.

సంచోర్ ప్రాంతంలో శుక్రవారం ఉదయం ఈ ప్రమాదం జరిగింది. తల్లిదండ్రులు నిర్వహిస్తున్న కాస్మెటిక్స్ (సౌందర్య సాధనాల) దుకాణంలో ఉన్న బాలుడు, ఒక్కసారిగా రోడ్డుపైకి పరిగెత్తినట్లు తెలుస్తోంది. అదే సమయంలో బస్టాండ్ వైపు నుంచి వేగంగా వచ్చిన ఓ స్కార్పియో కారు ఆ చిన్నారిని ఢీకొట్టింది.

కారు ఢీకొట్టడంతో బాలుడు సుమారు 10 అడుగుల దూరం వరకు ఈడ్చుకెళ్లబడినట్లు సమాచారం. ఈ ఘటన ఆ చిన్నారి తల్లి కళ్ల ముందే జరిగింది. ప్రమాదం జరగగానే సమీపంలో ఉన్న బాలుడి నానమ్మ పరుగెత్తుకుంటూ వచ్చి, కారు కింద ఇరుక్కుపోయిన బిడ్డను బయటకు తీశారు. కుటుంబ సభ్యులు వెంటనే బాలుడిని ఆసుపత్రికి తరలించగా, పరీక్షించిన వైద్యులు ఆ చిన్నారి అప్పటికే మృతి చెందినట్లు నిర్ధారించారు.

ఈ ప్రమాదానికి సంబంధించిన దృశ్యాలు సమీపంలోని దుకాణంలో అమర్చిన సీసీటీవీ (CCTV) కెమెరాలో రికార్డయ్యాయి. ప్రమాదం జరిగిన తర్వాత డ్రైవర్ స్కార్పియో కారును అక్కడే వదిలేసి పరారైనట్లు తెలుస్తోంది. దీంతో పోలీసులు ఆ కారును స్వాధీనం చేసుకుని, సీసీటీవీ ఫૂటేజీ ఆధారంగా పరారీలో ఉన్న డ్రైవర్ కోసం గాలిస్తున్నారు. ప్రమాదం జరిగిన తీరుపై కూడా పోలీసులు దర్యాప్తు చేస్తున్నారు.

మృతి చెందిన బాలుడు ఆ తల్లిదండ్రులకు ఒక్కగానొక్క కొడుకు అని సమాచారం. బాలుడి తల్లిదండ్రులు సంచోర్ ప్రాంతంలో దుకాణం నడుపుతూ జీవనం సాగిస్తున్నారు. తల్లిదండ్రుల కళ్ల ముందే జరిగిన ఈ విషాద ఘటన ఆ ప్రాంతంలో తీవ్ర దిగ్భ్రాంతిని కలిగించింది. ప్రస్తుతం సీసీటీవీ దృశ్యాలు, లభించిన ఇతర ఆధారాలతో పోలీసులు దర్యాప్తు కొనసాగిస్తున్నారు.