బీహార్ రాష్ట్రం కిషన్‌గంజ్ జిల్లాలోని తులసియా హాల్ట్ రైల్వే స్టేషన్ సమీపంలో కొందరు యువకులు ఓ యువతిని బలవంతంగా ఇంట్లోకి లాక్కెళ్లి దాడి చేసిన వీడియో సోషల్ మీడియాలో వైరల్ కావడంతో, పోలీసులు తక్షణమే రంగంలోకి దిగి కఠిన చర్యలు చేపట్టారు. ఈ ఘటన ఆ ప్రాంతంలో తీవ్ర కలకలం రేపింది.
దిఘల్‌బ్యాంక్ ప్రాంతంలో ఓ యువతిపై దాడి జరుగుతున్న వీడియో జిల్లా పోలీసు సూపరింటెండెంట్ (SP) సంతోష్ కుమార్ వాట్సాప్ నంబర్‌కు వచ్చింది. వెంటనే దర్యాప్తు ప్రారంభించిన పోలీసులు, ఈ ఘటన సుమారు 4-5 నెలల క్రితం తులసియా హాల్ట్ రైల్వే స్టేషన్ పరిసరాల్లో జరిగినట్లు గుర్తించారు.
ఆ వీడియోలో కొందరు యువకులు ఓ యువతిని ఇంట్లోకి లాక్కెళ్లి వాగ్వాదానికి దిగడం, ఆమెపై విచక్షణారహితంగా దాడి చేయడం రికార్డయింది. ఇది చూసిన ఎస్పీ, వెంటనే ప్రత్యేక బృందాన్ని (స్పెషల్ టీమ్) ఏర్పాటు చేసి నిందితులను పట్టుకోవాలని ఆదేశించారు. వీడియో ఆధారంగా దర్యాప్తు చేపట్టిన పోలీసులు, ఈ ఘటనతో సంబంధం ఉన్న ఐదుగురు యువకులను గుర్తించారు. వారిని అఫ్సర్ అలియాస్ హది, జుబేర్ ఖాన్, మిజాన్ అలియాస్ సల్మాన్, కామిల్, షెహజాద్‌లుగా తేల్చారు.
ఈ నేరానికి పాల్పడిన వారిలో ప్రస్తుతం అఫ్సర్ గుజరాత్‌లో, జుబేర్ ఖాన్ హర్యానాలో, మిజాన్ కర్ణాటకలో, కామిల్ పంజాబ్‌లో నివసిస్తున్నట్లు పోలీసుల విచారణలో తేలింది. పరారీలో ఉన్న వీరిని పట్టుకునేందుకు ప్రత్యేక పోలీసు బృందాలు ముమ్మరంగా గాలిస్తున్నాయి.
బాధిత యువతిని గుర్తించి పోలీసులు విచారించగా.. తన స్నేహితురాలిని కలిసేందుకు రైల్వే స్టేషన్‌కు వెళ్లినప్పుడు, స్థానిక యువకులు కొందరు తనను అడ్డుకుని అసభ్య పదజాలంతో దూషిస్తూ దాడి చేశారని తెలిపింది. ఆ సమయంలో గ్రామ పెద్దలు, సర్పంచ్ సమక్షంలో పంచాయితీ పెట్టి రాజీ కుదిర్చినప్పటికీ, తాజాగా వీడియో వైరల్ కావడంతో పోలీసులు సుమోటోగా (స్వయంగా) కేసు నమోదు చేశారు.
ఈ కేసులో నిందితుడైన షెహజాద్ (21) అనే యువకుడిని పోలీసులు అరెస్టు చేశారు. అతడిని విచారిస్తున్నామని, మిగిలిన నిందితులను కూడా త్వరలోనే అరెస్టు చేస్తామని ఎస్పీ వెల్లడించారు.
Leave a Reply