“దెయ్యాన్ని చూశాం!” అంటూ పుకార్లు.. అర్ధరాత్రి యూనివర్సిటీలో గుమిగూడిన వందలాది మంది విద్యార్థులు! హాస్టల్‌లో ఇద్దరు విద్యార్థినులు గల్లంతు, వింత శబ్దాలు వినిపించాయన్న ప్రచారంతో ఒక్కసారిగా రేగిన కలకలం!

పంజాబ్ రాష్ట్రం పాటియాలాలోని చిత్కారా యూనివర్సిటీలో (Chitkara University) దెయ్యం తిరుగుతోందని, ఇద్దరు విద్యార్థినులు కనిపించకుండా పోయారని సోషల్ మీడియాలో పుకార్లు వ్యాపించడంతో.. అర్ధరాత్రి వేళ పెద్ద సంఖ్యలో విద్యార్థులు గుమిగూడి ఆందోళనకు దిగారు.

ఈ వదంతుల కారణంగా యూనివర్సిటీ క్యాంపస్‌లో ఒక్కసారిగా ఉద్రిక్త వాతావరణం నెలకొంది. సమాచారం అందుకున్న పోలీసులు వెంటనే అక్కడికి చేరుకుని విద్యార్థులను సముదాయించేందుకు ప్రయత్నించారు.

ఆ సమయంలో పోలీసులకు, విద్యార్థులకు మధ్య తోపులాట జరిగినట్లు తెలుస్తోంది. ఈ ఘర్షణలో పోలీసుల ప్రభుత్వ వాహనం ఒకటి ధ్వంసమైంది. అంతేకాకుండా, ఓ పోలీసు అధికారి పట్ల విద్యార్థులు దురుసుగా ప్రవర్తించి తోపులాటకు దిగినట్లు సమాచారం. దీంతో పరిస్థితిని అదుపులోకి తెచ్చేందుకు వివిధ పోలీస్ స్టేషన్ల నుంచి అదనపు బలగాలను రప్పించారు. అనంతరం విద్యార్థులతో పోలీసులు చర్చలు జరిపారు.

గతంలో యూనివర్సిటీలో ఓ విద్యార్థిని ఆత్మహత్య చేసుకుందని, అప్పటి నుంచి ఆమె ఆత్మ హాస్టల్‌లో తిరుగుతోందని విద్యార్థుల మధ్య పుకార్లు వ్యాపించాయి. అయితే, అలాంటి ఘటన జరిగినట్లు ఎలాంటి ఆధారాలు లేవని యూనివర్సిటీ యాజమాన్యం, పోలీసులు స్పష్టం చేశారు. రాత్రి సమయాల్లో కొందరు ఆకతాయిలు విద్యార్థుల గది తలుపులు కొట్టి పారిపోతున్నారని, అదే భయాన్ని, పుకార్లను మరింత పెంచి ఉండవచ్చని పోలీసులు తెలిపారు.

మరోవైపు ఇద్దరు విద్యార్థినులు గల్లంతయ్యారని సోషల్ మీడియాలో ప్రచారం జరిగింది. కానీ, ఇప్పటివరకు ఏ విద్యార్థిని కూడా కనిపించకుండా పోయినట్లు నిర్ధారణ కాలేదని పోలీసులు తేల్చి చెప్పారు. విద్యార్థుల నుంచి అందిన ఫిర్యాదులపై పోలీసులు విచారణ జరుపుతుండటంతో పాటు, యూనివర్సిటీ ప్రాంగణంలోని సీసీటీవీ (CCTV) దృశ్యాలను పరిశీలించనున్నారు. అధికారుల చర్చల అనంతరం విద్యార్థులు శాంతించి తిరిగి తమ హాస్టళ్లకు వెళ్లడంతో, ప్రస్తుతం పరిస్థితి అదుపులోనే ఉందని పోలీసులు వెల్లడించారు.