ఏడాది లోపు పిల్లలకు తేనె ఇవ్వకండి! ఇంట్లోని పెద్దలు చెప్పినా జాగ్రత్త వహించండి! దీనివల్ల పిల్లలకు ఎలాంటి ప్రమాదమో తెలుసా?

బిడ్డ పుట్టగానే తేనె నాటించడం వంటి కొన్ని సాంప్రదాయ పద్ధతులు నేటికీ చాలా ఇళ్లలో పాటిస్తున్నారు.

అయితే, బిడ్డకు ఏడాది నిండకముందే తేనె ఇవ్వడం వల్ల ప్రమాదం జరిగే అవకాశం ఉందని వైద్యులు హెచ్చరిస్తున్నారు. ముఖ్యంగా, పుట్టిన మొదటి ఆరు నెలల వరకు తల్లిపాలు మాత్రమే బిడ్డకు తగిన ఆహారంగా, శరీరానికి కావాల్సిన నీటి శాతాన్ని అందించేవిగా ఉంటాయి. ఈ సమయంలో నీరు లేదా ఇతర ఆహారాలను విడిగా ఇవ్వాల్సిన అవసరం లేదు. శిశువు జీర్ణవ్యవస్థ పూర్తిగా అభివృద్ధి చెందని కారణంగా, ఆహారం ఇచ్చే విషయంలో మరింత జాగ్రత్త అవసరం.

అపోలో స్పెక్ట్రా ఆసుపత్రి పిల్లల వైద్య నిపుణులు డాక్టర్ శశాంక్ త్రివేది తెలిపిన వివరాల ప్రకారం.. ఏడాది కంటే తక్కువ వయస్సు ఉన్న పిల్లలకు తేనె ఇవ్వకూడదు. ఇది సహజమైన ఆహారమే అయినప్పటికీ, తేనెలో కొన్నిసార్లు ‘క్లోస్ట్రిడియం బోటులినమ్’ (Clostridium botulinum) అనే బ్యాక్టీరియా బీజాంశాలు (spores) ఉండే అవకాశం ఉంది. శిశువుల పేగులు పూర్తిగా అభివృద్ధి చెందకపోవడం వల్ల, ఈ బీజాంశాలు పేగుల్లో పెరిగి విష పదార్థాలను (టాక్సిన్స్) ఉత్పత్తి చేయవచ్చు. దీనివల్ల ‘ఇన్‌ఫాంట్ బోటులిజం’ (Infant Botulism) అనే అరుదైన, కానీ తీవ్రమైన వ్యాధి వచ్చే ప్రమాదం ఉంది.

ఈ వ్యాధి సోకితే పిల్లల్లో మలబద్ధకం, పాలు తాగడంలో ఇబ్బంది, పాలు పీల్చుకునే సామర్థ్యం తగ్గడం, ఏడుపు శబ్దం బలహీనంగా మారడం వంటి లక్షణాలు కనిపించవచ్చు. శరీరం వదులుగా మారడం, కండరాల బలహీనత వంటి లక్షణాలు కూడా కనిపించవచ్చు. తీవ్రమైన పరిస్థితుల్లో శ్వాస తీసుకోవడంలోనూ ఇబ్బంది తలెత్తవచ్చు. ఇలాంటి లక్షణాలు కనిపిస్తే వెంటనే వైద్యుడిని సంప్రదించాలి. ఈ వ్యాధి అరుదైనదే అయినప్పటికీ, దీనివల్ల కలిగే ప్రమాదం తీవ్రంగా ఉంటుంది కాబట్టి ముందుజాగ్రత్త చాలా అవసరం.

కాబట్టి, బిడ్డకు 12 నెలలు నిండే వరకు తేనెను నేరుగా గానీ లేదా పాలు, నీరు, ఇతర శిశు ఆహారాలతో కలిపి గానీ ఇవ్వకూడదు. తేనె కలిపిన ఇంటి ఆహారాలను కూడా నివారించాలి. ఆరు నెలల వరకు బిడ్డకు తల్లిపాలు మాత్రమే ఇవ్వాలి; సాధారణంగా ఈ కాలంలో విడిగా నీరు ఇవ్వాల్సిన అవసరం ఉండదు. నీరు ఇవ్వడం వల్ల బిడ్డ పాలు తక్కువగా తాగే అవకాశం ఉంది; అంతేకాకుండా అధిక నీరు శరీరంలోని లవణాల (ఉప్పు) సమతుల్యతను కూడా దెబ్బతీస్తుంది. ఏడాది తర్వాత తేనె ఇవ్వవచ్చు కానీ, పరిమితంగా ఇవ్వడం మంచిది.