“నా ఇంటి ముందు మద్యం తాగొద్దు!” — ప్రశ్నించిన 70 ఏళ్ల వృద్ధురాలిపై అమానుషం.. మద్యం మత్తులో పైశాచికత్వం.. వృద్ధురాలిపై దాడి చేసి, సామూహిక లైంగిక దాడికి పాల్పడి పొదల్లో పడేసిన మృగాళ్లు.. షాకింగ్ ఘటన!

ఉత్తరప్రదేశ్‌లో తన ఇంటి సమీపంలో మద్యం సేవిస్తున్న ఇద్దరు వ్యక్తులను మందలించిన 70 ఏళ్ల వృద్ధురాలిపై సామూహిక లైంగిక దాడి జరిపి, దారుణంగా హత్య చేసిన ఘటన తీవ్ర దిగ్భ్రాంతిని కలిగించింది.

ఈ దారుణ ఘటనకు సంబంధించి ఇద్దరు నిందితులను పోలీసులు అరెస్టు చేశారు.

సెప్టెంబర్ 25, 26 తేదీల మధ్య ఈ ఘటన చోటుచేసుకుంది. తన ఇంటి సమీపంలో రాజేష్ అలియాస్ గుడ్డు (30), హరిరామ్ రావత్ (34) అనే ఇద్దరు వ్యక్తులు మద్యం తాగుతుండటాన్ని గమనించిన ఆ వృద్ధురాలు, వారిని అక్కడి నుంచి వెళ్లిపోవాలని మందలించింది. దీంతో ఆగ్రహానికి గురైన ఆ దుండగులు వృద్ధురాలితో వాగ్వాదానికి దిగారు.

గొడవ జరుగుతున్న సమయంలో ఆ ఇద్దరు వ్యక్తులు వృద్ధురాలిపై దాడి చేసి, అత్యంత క్రూరంగా సామూహిక లైంగిక దాడికి పాల్పడ్డారు. దాడి సమయంలో వృద్ధురాలి తల ఇనుప మంచానికి బలంగా తగలడం, దుండగులు ఆమె గొంతు నులమడంతో ఆమె ఘటనా స్థలంలోనే ప్రాణాలు కోల్పోయినట్లు సమాచారం.

అనంతరం ఆ వృద్ధురాలి మృతదేహాన్ని సుమారు 50 మీటర్ల దూరం ఈడ్చుకెళ్లి ఇంటి వెనుక ఉన్న పొదల్లో పడేసి వెళ్లిపోయారు. వృద్ధురాలు కనిపించకపోవడంతో గాలించిన కుటుంబ సభ్యులు, పొదల్లో ఆమె మృతదేహాన్ని గుర్తించి వెంటనే మోహన్‌లాల్‌గంజ్ పోలీస్ స్టేషన్‌లో ఫిర్యాదు చేశారు.

కేసు నమోదు చేసుకున్న పోలీసులు ఆ ప్రాంతంలోని సీసీటీవీ (CCTV) దృశ్యాలు, సాంకేతిక ఆధారాలను పరిశీలించి రాజేష్, హరిరామ్‌లను అరెస్టు చేసి జైలుకు తరలించారు. దాడిలో తగిలిన తీవ్ర గాయాల వల్లే వృద్ధురాలు మృతి చెందినట్లు పోస్టుమార్టం నివేదికలో సైతం నిర్ధారణ అయింది.