“అయ్యో అమ్మా నన్ను వదిలేయండి..! నేను చచ్చిపోతాను”.. పోలీస్ స్టేషన్‌లో యువకుడిపై దారుణ దాడి.. విలవిలలాడుతూ వేడుకుంటున్నా లాఠీలతో ప్రతాపం.. వీడియో వైరల్ అవ్వడంతో బయటపడ్డ అసలు నిజం..!

బీహార్ రాష్ట్రం తూర్పు చంపారన్ జిల్లాలోని చిరైయా పోలీస్ స్టేషన్ ఆవరణలో ఓ యువకుడిపై దాడి చేసిన వీడియో సోషల్ మీడియాలో విడుదలై తీవ్ర కలకలం రేపింది.

ఈ ఘటన నేపథ్యంలో ఆ రాష్ట్ర పోలీసుల తీరుపై పలు ప్రశ్నలు తలెత్తుతున్నాయి.

వైరల్ అయిన వీడియోలో, ఓ యువకుడు నేలపై కూర్చుని నొప్పి భరించలేక, “అయ్యో.. నన్ను వదిలేయండి.. చచ్చిపోతాను” అంటూ విలవిలలాడుతూ కేకలు వేస్తున్న దృశ్యాలు రికార్డయ్యాయి. ఆ సమయంలో, సివిల్ డ్రెస్‌లో ఉన్న ఓ అధికారి చేతిలో లాఠీ పట్టుకుని ఆ యువకుడిని దారుణంగా కొడుతున్నాడు. వెనుక నుండి మరో వ్యక్తి అతడిని వదిలేయమని అడుగుతున్న శబ్దం కూడా వినిపిస్తోంది.

దర్యాప్తులో, దాడికి గురైన యువకుడు బెల్హి గ్రామానికి చెందిన టున్‌టున్ షా అని, మద్యం సేవించాడనే కారణంతో గత సెప్టెంబర్ 25న పోలీసులు అతడిని అరెస్ట్ చేశారని తేలింది. వీడియోలో లాఠీతో దాడి చేసిన వ్యక్తి చిరైయా పోలీస్ స్టేషన్ అదనపు ఎస్సై మధుకర్ కుమార్ అని చెబుతున్నారు. అయితే, దీనికి సంబంధించిన అధికారిక ధృవీకరణ విచారణ తర్వాతే తెలుస్తుందని పోలీసు వర్గాలు తెలిపాయి.

అరెస్ట్ అయిన టున్‌టున్ షాను సిక్రహనా సబ్-డివిజనల్ కోర్టులో హాజరుపరిచారు. అక్కడ అతనికి జరిమానా విధించి బెయిల్ మంజూరు చేశారు. ఒక వ్యక్తిపై చట్టబద్ధంగా కేసు నమోదు చేసి కోర్టులో హాజరుపరిచే నిబంధనలు ఉన్నప్పుడు, పోలీస్ స్టేషన్ ఆవరణలో పెట్టి అతడిని ఇంత దారుణంగా కొట్టాల్సిన అవసరం ఏముందని సామాజిక కార్యకర్తలు, సామాన్య ప్రజలు ప్రశ్నిస్తున్నారు.

ఈ వీడియో వైరల్ అవ్వడంతో, మోతిహారి జిల్లా పోలీస్ సూపరింటెండెంట్ (SP) స్వర్ణ్ ప్రభాత్ ఈ విషయాన్ని సీరియస్‌గా తీసుకున్నారు. ఈ ఘటనపై వివరణ కోరుతూ అదనపు ఎస్సై మధుకర్ కుమార్‌కు నోటీసులు జారీ చేశారు. శాఖాపరమైన విచారణ తర్వాతే ఆ రోజు అసలు ఏం జరిగిందనేది, ఇందులో ఎవరెవరి ప్రమేయం ఉందనేది పూర్తిగా బయటపడుతుందని భావిస్తున్నారు.