సోషల్ మీడియాలో లక్షలాది మంది అభిమానులను సంపాదించుకుని, అందాల పోటీల్లో కిరీటాలు గెలుచుకుని వెలుగొందిన ఓ యువతి జీవితం.. కేవలం ఒక్క ఫోన్ కాల్‌తో ముగిసిపోయిన ఘటన స్థానికంగా తీవ్ర దిగ్భ్రాంతిని, విషాదాన్ని నింపింది.
మధ్యప్రదేశ్ రాష్ట్రం సింగ్రౌలీ జిల్లా మోర్వాకు చెందిన 30 ఏళ్ల నిధి తివారీ.. ఇన్‌స్టాగ్రామ్ తదితర సోషల్ మీడియా వేదికల్లో 9 లక్షలకు పైగా ఫాలోవర్లతో ఎంతో పాపులర్ అయ్యారు. అనేక స్థానిక సాంస్కృతిక కార్యక్రమాలు, అందాల పోటీల్లో పాల్గొని పలు టైటిల్స్ గెలుచుకున్న నిధి తివారీ.. శనివారం సాయంత్రం తన ఇంటి గదిలో ఆత్మహత్య చేసుకున్నారు.
కుటుంబానికి సన్నిహితుడైన వినయ్ సింగ్ తెలిపిన వివరాల ప్రకారం.. శనివారం సాయంత్రం సుమారు 7:30 గంటల సమయంలో నిధి తివారీ తన గదిలో ఉంటూ ఢిల్లీకి చెందిన ఓ యువకుడితో ఫోన్‌లో మాట్లాడుతున్నారు. ఆ సమయంలో ఏదో విషయమై వారిద్దరి మధ్య తీవ్ర వాగ్వాదం జరిగింది. దీంతో తీవ్ర ఆగ్రహానికి, మానసిక వేదనకు గురైన నిధి తివారీ వెంటనే తన గది తలుపును లోపలి నుంచి గడియ పెట్టుకున్నారు.
కాసేపటికే ఫోన్‌లో మాట్లాడుతున్న ఆ ఢిల్లీ యువకుడే స్వయంగా నిధి తివారీ తల్లికి, సోదరికి ఫోన్ చేసి.. “వెంటనే గది తలుపు తెరిచి చూడండి!” అని కంగారుగా చెప్పాడు. దీంతో షాక్‌కు గురైన కుటుంబ సభ్యులు తలుపు పగలగొట్టి లోపలికి వెళ్లి చూడగా, నిధి తివారీ గదిలోని సీలింగ్ ఫ్యాన్‌కు ఉరివేసుకుని వేలాడుతూ కనిపించారు.
భయభ్రాంతులకు గురైన కుటుంబ సభ్యులు ఆమెను కిందికి దించి వెంటనే సమీపంలోని ఆసుపత్రికి తరలించారు. అయితే, ఆమెను పరీక్షించిన వైద్యులు అప్పటికే మృతి చెందినట్లు నిర్ధారించారు.
ఈ ఘటనపై మోర్వా పోలీస్ స్టేషన్ అధికారి డాక్టర్ జ్ఞానేంద్ర సింగ్ మాట్లాడుతూ.. “ప్రాథమిక విచారణలో ఇది ఆత్మహత్య కేసుగానే కనిపిస్తోంది. అయితే ఆత్మహత్యకు గల కచ్చితమైన కారణం ఇంకా తెలియరాలేదు. ఆ యువకుడితో ఫోన్‌లో మాట్లాడిన కాల్ డేటా, వాట్సాప్ చాటింగ్‌లను స్వాధీనం చేసుకుని అన్ని కోణాల్లోనూ లోతుగా దర్యాప్తు చేస్తున్నాం” అని తెలిపారు. 9 లక్షలకు పైగా ఫాలోవర్లతో స్టార్‌గా వెలుగొందిన ఓ యువతి, క్షణికావేశంలో తన ప్రాణాలను తీసుకోవడం సోషల్ మీడియా ప్రపంచాన్ని తీవ్ర విషాదంలో ముంచెత్తింది.
Leave a Reply