హర్యానాలోని సీహీ గ్రామంలో ఆదివారం సాయంత్రం 3 ఏళ్ల చిన్నారి నేహా ఎప్పటిలాగే వీధి చివర ఇతర పిల్లలతో కలిసి ఆడుకుంటోంది.
ఆటలో లీనమైన ఆ చిన్నారి, సమీపంలోనే మూత లేకుండా తెరిచి ఉన్న బోరుబావిని గమనించలేకపోయింది.
కనురెప్పపాటులో ఆ పాప లోతైన బోరుబావిలో ప్రమాదవశాత్తూ పడిపోయింది. దీంతో భయపడిపోయిన తోటి పిల్లలు గట్టిగా కేకలు వేయడంతో, చుట్టుపక్కల వారు పరుగున వచ్చి చిన్నారి తండ్రి, కూలీ అయిన రామదీన్‌కు సమాచారం అందించారు. ఉత్తరప్రదేశ్‌లోని మెయిన్‌పురికి చెందిన రామదీన్, గత కొన్నేళ్లుగా తన కుటుంబంతో కలిసి ఇక్కడే నివాసం ఉంటూ కూలీ పనులు చేసుకుంటున్నాడు.
సమాచారం అందుకున్న వెంటనే హర్యానా పోలీసులు, జాతీయ విపత్తు ప్రతిస్పందన దళం (NDRF), రాష్ట్ర విపత్తు ప్రతిస్పందన దళం (SDRF), మున్సిపల్, ఆరోగ్య శాఖ అధికారులు ఘటనా స్థలానికి చేరుకున్నారు. ఘజియాబాద్ నుంచి వచ్చిన ఎన్డీఆర్ఎఫ్ బృందం అర్ధరాత్రి వేళ కూడా సహాయక చర్యలను ముమ్మరం చేసింది.
మొదట్లో బోరుబావి లోపల నుంచి చిన్నారి నేహా ఏడుపు శబ్దం స్పష్టంగా వినిపించింది. కానీ, సమయం గడిచేకొద్దీ ఆ శబ్దం పూర్తిగా ఆగిపోయింది. సహాయక బృందాలు తెచ్చిన యంత్రాలు ఆ ఇరుకైన రంధ్రంలో పనిచేయకపోవడంతో, వెంటనే స్థానిక వడ్రంగి సహాయంతో అక్కడికక్కడే ఒక కొత్త పరికరాన్ని తయారు చేశారు.
సుమారు 300 అడుగుల లోతు ఉన్న ఆ బోరుబావిని గత 15 ఏళ్లుగా ఉపయోగించడం లేదు. అయితే, 125 అడుగుల లోతుకు పైగా నీరు నిలిచి ఉండటం, చిన్నారి 200 అడుగుల కంటే ఎక్కువ లోతులో తలకిందులుగా ఇరుక్కుపోవడంతో సహాయక చర్యలకు తీవ్ర ఆటంకం కలిగింది.
సుమారు 10 గంటల తీవ్ర పోరాటం తర్వాత, సోమవారం తెల్లవారుజామున 4 గంటల ప్రాంతంలో చిన్నారి కాలు పట్టుకుని పైకి లాగారు. కానీ, అప్పటికే పాప శరీరంలో ఎలాంటి కదలిక లేదు. వెంటనే సమీపంలోని ప్రైవేట్ ఆసుపత్రికి తరలించగా, పరీక్షించిన వైద్యులు చిన్నారి అప్పటికే మృతి చెందినట్లు నిర్ధారించారు.
ఈ ఘోర కలికి మున్సిపల్ అధికారుల నిర్లక్ష్యమే కారణమంటూ స్థానికులు తీవ్ర ఆగ్రహం వ్యక్తం చేస్తున్నారు. “అది 15 ఏళ్ల క్రితమే మూత వేసిన బోరుబావి. దాని మూత ధ్వంసమైన విషయం మాకు తెలియదు, దీనిపై విచారణ జరిపి బాధ్యులపై చర్యలు తీసుకుంటాం” అని మున్సిపల్ అధికారి తెలిపారు.
అధికారుల నిర్లక్ష్యానికి ఓ పసి ప్రాణం బలైన ఈ ఘటన హర్యానా రాష్ట్రవ్యాప్తంగా తీవ్ర విషాదాన్ని, ఆగ్రహాన్ని నింపింది.
Leave a Reply