తిరుచ్చి జిల్లా కల్లకుడి పోలీస్ స్టేషన్‌లోకి చొరబడిన ఓ వ్యక్తి, అక్కడ భద్రతా విధుల్లో ఉన్న మహిళా కానిస్టేబుల్‌ను కత్తి చూపించి బెదిరించి, తన ద్విచక్ర వాహనాన్ని బలవంతంగా తీసుకెళ్లిన ఘటన తీవ్ర కలకలం రేపింది.
పోలీసుల భద్రతా వలయంలో ఉండే స్టేషన్ ఆవరణలోనే ఇలాంటి సాహసానికి ఒడిగట్టడం ఆ ప్రాంతంలో పెను సంచలనంగా మారింది.
ఘటన జరిగిన రోజు రాత్రి కల్లకుడి పోలీస్ స్టేషన్ స్పెషల్ సబ్ ఇన్‌స్పెక్టర్ (SSI) సోఫియా నేతృత్వంలోని పెట్రోలింగ్ పోలీసులు ముమ్మరంగా వాహన తనిఖీలు చేపట్టారు. ఆ సమయంలో ఒ.కూత్తూర్ (హోండాకురిచ్చి) ప్రాంతానికి చెందిన రాజా (40) అనే వ్యక్తి మద్యం మత్తులో బైక్ నడుపుతూ రావడంతో పోలీసులు అతడిని అడ్డుకున్నారు. అనంతరం అతని వాహనాన్ని సీజ్ చేసిన పోలీసులు, మరుసటి రోజు ఉదయం పోలీస్ స్టేషన్‌కు వచ్చి సరైన పత్రాలు చూపించి బైక్ తీసుకెళ్లాలని సూచించి పంపేశారు.
అయితే, పోలీసుల సూచనను పట్టించుకోని రాజా, కాసేపటికే మళ్లీ పోలీస్ స్టేషన్‌లోకి దూసుకొచ్చాడు. అక్కడ రాత్రి విధుల్లో ఉన్న మహిళా కానిస్టేబుల్ శింబుతో వాగ్వాదానికి దిగాడు. ఈ క్రమంలో తాను దాచుకున్న కత్తిని ఒక్కసారిగా బయటకు తీసి ఆమెను బెదిరించాడు. మహిళా కానిస్టేబుల్ తేరుకునేలోపే స్టేషన్‌లో ఉన్న తన బైక్‌ను తీసుకుని అక్కడి నుంచి పరారయ్యాడు. పరారీలో ఉన్న రాజా కోసం పోలీసులు ముమ్మరంగా గాలిస్తున్నారు.
Leave a Reply