సొంత ఊరిలో ఆకలి, పేదరికం తాండవిస్తున్నప్పుడు.. పక్కింటి గొడవలో తలదూర్చి లాభం పొందాలనుకుంటే ఏమవుతుంది? ఇప్పుడు పాకిస్థాన్‌కు సరిగ్గా అలాంటి పరిస్థితే ఎదురైంది.
ఒకవైపు అదుపుతప్పిన ధరల పెరుగుదల, మరోవైపు నిండుకున్న విదేశీ మారకద్రవ్య నిల్వలతో దేశం మొత్తం ఉక్కిరిబిక్కిరి అవుతున్న తరుణంలో, పాకిస్థాన్ ఎదుర్కోబోతున్న తదుపరి పెను ముప్పు గురించి ఓ షాకింగ్ సమాచారం వెలుగులోకి వచ్చింది.
దేశంలో పెట్రోల్ ధర లీటరుకు రూ.1,000 దాటినా ఆశ్చర్యపోవాల్సిన పనిలేదని పాకిస్థాన్ పెట్రోలియం శాఖ మంత్రి అలీ పర్వేజ్ మాలిక్ సంచలన హెచ్చరిక జారీ చేశారు. ఇప్పటికే పెట్రోల్, డీజిల్ ధరలు చరిత్రలో ఎన్నడూ లేనంత గరిష్ట స్థాయికి చేరుకోగా, ద్రవ్యోల్బణం రెండంకెల స్థాయికి చేరి సామాన్యుల రోజువారీ జీవితాన్ని నరకప్రాయంగా మార్చేసింది.
ఇరాన్ యుద్ధంలో మధ్యవర్తిత్వం వహిస్తామనే పేరుతో ఇస్లామాబాద్ వేసిన దౌత్యపరమైన లెక్కలన్నీ ఇప్పుడు తలకిందులయ్యాయి. అమెరికా, ఇరాన్ ప్రతినిధులను పిలిచి ఇస్లామాబాద్‌లో పాకిస్థాన్ ఓ అవగాహన ఒప్పందం కుదుర్చుకుంది. దీని ద్వారా అమెరికా నుంచి భారీగా నిధులు రాబట్టుకుని దాన్ని భారత్‌కు వ్యతిరేకంగా వాడుకోవచ్చని, అదే సమయంలో ఇరాన్ నుంచి తక్కువ ధరకే ముడి చమురు పొందవచ్చని పాకిస్థాన్ లెక్కలు వేసుకుంది. దాంతో పాటే సౌదీ అరేబియాతోనూ ఓ రక్షణ ఒప్పందం కుదుర్చుకుంది.
కానీ, ఆ ఒప్పందం కనీసం వారం రోజులు కూడా నిలవలేదు. పాకిస్థాన్ వేసుకున్న ప్రణాళికలన్నీ ఇప్పుడు బెడిసికొట్టాయి. ఇరాన్‌కు పొరుగు దేశమైన పాకిస్థాన్ ప్రత్యక్షంగా ఈ యుద్ధంలో పాల్గొనకపోయినప్పటికీ, దాని ప్రభావం ఆ దేశాన్ని నేరుగా దెబ్బతీయడం మొదలుపెట్టింది. పాకిస్థాన్ తనకు అవసరమైన ముడి చమురులో సింహభాగాన్ని సౌదీ అరేబియా నుంచే దిగుమతి చేసుకుంటుంది. అయితే, ఇరాన్ ‘హోర్ముజ్ జలసంధి’ (Strait of Hormuz) సముద్ర మార్గాన్ని మూసివేయబోతున్నట్లు ప్రకటించడం, మరోవైపు బాబ్ అల్-మండేబ్ ప్రాంతంలో హౌతీ తిరుగుబాటుదారుల కదలికలు పెరగడంతో సౌదీ నుంచి పాకిస్థాన్‌కు రావాల్సిన చమురు సరఫరా పూర్తిగా నిలిచిపోయింది.
ఇప్పటికే భారత్, ఆఫ్ఘనిస్తాన్ సరిహద్దుల్లో నెలకొన్న ఉద్రిక్త పరిస్థితుల వల్ల పాకిస్థాన్ సైన్యం తీవ్ర ఒత్తిడిలో ఉండగా, ఇప్పుడు ఈ ఇంధన కొరత దేశం మొత్తాన్ని స్తంభింపజేసే స్థితికి నెట్టింది.
పాకిస్థాన్ స్థూల దేశీయోత్పత్తిలో (GDP) అప్పుల వాటా 80 శాతాన్ని దాటిపోయింది. చేతిలో ఉన్న అతి తక్కువ విదేశీ మారకద్రవ్య నిల్వలతో కేవలం మరికొన్ని వారాల పాటు మాత్రమే వస్తువులను దిగుమతి చేసుకోగల గడ్డు పరిస్థితి నెలకొంది. దేశ ఆదాయంలో సింహభాగం పాత అప్పుల వడ్డీలు కట్టడానికే సరిపోతోంది.
అంతర్జాతీయ ద్రవ్యనిధి సంస్థ (IMF) ఇస్తున్న 8.4 బిలియన్ డాలర్ల రుణ ప్యాకేజీ కింద విధించిన కఠినమైన ఆర్థిక సంస్కరణల షరతుల వల్ల, పాకిస్థాన్ ప్రభుత్వం తమ ప్రజలకు ఎలాంటి ఊరటను గానీ, సబ్సిడీలను గానీ ఇవ్వలేని దుస్థితి ఏర్పడింది. సరిహద్దుల్లో ఉగ్రవాద ముప్పు, నిరుద్యోగం, ఆకాశాన్నంటుతున్న విద్యుత్, గ్యాస్ ఛార్జీలు.. ఇలా అన్ని వైపుల నుంచీ పాకిస్థాన్ ఇప్పుడు బయటపడలేని పెను తుఫానులో చిక్కుకుని విలవిలలాడుతోంది.
Leave a Reply