“శనివారం ఈమెయిల్ పంపుతా.. ఆదివారం రిప్లై రాకపోతే అంతే సంగతులు..! సరదాగా గడపాలని అనుకుంటే లోపలికి రావద్దు.. ఉబెర్ సీఈవో వివాదాస్పద వ్యాఖ్యలు.. రగిలిపోతున్న ఐటీ ఉద్యోగులు..!!”

వారాంతాల్లో (వీకెండ్స్‌లో) కూడా ఈమెయిల్స్‌కు సమాధానం ఇవ్వడమే నిజమైన కష్టపడే తత్వం అని ఉబర్ సీఈవో దారా ఖోస్రోషాహి చేసిన వ్యాఖ్యలు ఇంటర్నెట్‌లో తీవ్ర చర్చకు దారితీశాయి.

ఉబర్ సంస్థ పని సంస్కృతి చాలా కఠినంగా ఉంటుందని పేర్కొన్న ఆయన, “సరదాగా సమయం గడపాలని అనుకునేవారు మా కంపెనీలోకి రావద్దు” అని బాహాటంగానే హెచ్చరించారు.

అంతేకాకుండా, “శనివారాల్లో ఉద్యోగులకు ఈమెయిళ్లు పంపడం, ఆదివారానికల్లా రిప్లై రాకపోతే ఏమైందని ప్రశ్నించడం నాకు అలవాటు” అని తెలిపారు. సంస్థ అనుసరిస్తున్న ఈ పనితీరు వల్లే తాము భారీ ఆర్థిక లాభాలను సాధించగలిగామని ఆయన గర్వంగా చెప్పుకొచ్చారు.

అయితే, ఆయన వ్యాఖ్యలపై సోషల్ మీడియాలో—ముఖ్యంగా రెడ్డిట్ (Reddit) వేదికగా—తీవ్ర వ్యతిరేకత, విమర్శలు వెల్లువెత్తుతున్నాయి. “వీకెండ్స్‌లో పనిచేయడం కష్టపడి పనిచేయడం కిందకు రాదు” అని, ఇది ఉద్యోగుల వ్యక్తిగత జీవితాలను తీవ్రంగా దెబ్బతీస్తుందని నెటిజన్లు మండిపడుతున్నారు.

మరోవైపు కొందరు, “ఇలా బాహాటంగా మాట్లాడటమే మంచిది, దీనివల్ల ఏ కంపెనీని దూరం పెట్టాలో ఉద్యోగులకు ముందే తెలుస్తుంది” అని వ్యాఖ్యానిస్తుండగా, ఇంకొందరు “ఉబర్ లాంటి భారీ ప్లాట్‌ఫామ్‌ను నడపాలంటే ఇంత కఠిన శ్రమ తప్పదు” అంటూ భిన్నమైన అభిప్రాయాలను వ్యక్తం చేస్తున్నారు.