“ప్రేమించడమే తప్పయింది!” ఇద్దరి అంగీకారం ఉన్నా యువకుడికి 20 ఏళ్ల జైలు శిక్ష.. సంచలనం రేపుతున్న పోక్సో కోర్టు తీర్పు..!!

ప్రేమ వ్యవహారమైనా సరే, చట్టం దృష్టిలో వయోపరిమితి ఎంత ముఖ్యమో తెలియజేసేలా వడోదర ప్రత్యేక పోక్సో (POCSO) కోర్టు ఒక సంచలన తీర్పును వెలువరించింది.

వడోదర నగరంలో గత 2025 మార్చి నెలలో నమోదైన ఈ కేసులో, ఒక యువకుడు, బాలిక పరస్పర అంగీకారంతోనే తమంతట తాముగా ఇంటి నుండి వెళ్లిపోయినట్లు విచారణలో తేలింది.

వారిద్దరూ ప్రేమించుకున్నారనే విషయాన్ని, ఆ బాలిక తన ఇష్టపూర్వకంగానే ప్రియుడితో వెళ్లిందనే విషయాన్ని కోర్టు బహిరంగంగానే అంగీకరించింది. అయినప్పటికీ, ఆ సంఘటన జరిగినప్పుడు బాలికకు 18 ఏళ్లు నిండకపోవడంతో, వారి పరస్పర అంగీకారం, ప్రేమ వాదనలు చట్టం ముందు నిలబడలేకపోయాయి.

పోక్సో చట్టంలోని కఠిన నిబంధనల ప్రకారం, మైనర్ బాలికల విషయంలో ‘అంగీకారం’ అనే మాటకు తావు లేకపోవడంతో కోర్టు తన తీర్పులో ఎలాంటి సడలింపు ఇవ్వలేదు. కేసులో అన్ని వైపుల వాదనలు విన్న న్యాయమూర్తి, నిందితుడైన యువకుడికి 20 ఏళ్ల కఠిన కారాగార శిక్ష విధిస్తూ తీర్పునిచ్చారు.

కేసు విచారణ సమయంలో బాలిక తన ఇష్టప్రకారమే వెళ్లినందున ఆమెకు ప్రత్యేక నష్టపరిహారం ఇవ్వడానికి కోర్టు నిరాకరించింది. అయితే, నిందితుడికి విధించిన జరిమానా మొత్తం నుండి రూ.45,000 బాధిత బాలికకు అందజేయాలని ఆదేశించింది.

నిందితుడి చిన్న వయస్సు, గతంలో ఎలాంటి నేర చరిత్ర లేకపోవడం వంటి కారణాలను అతని తరపు న్యాయవాది కోర్టు ముందు ఉంచినప్పటికీ, చట్టం ఉచ్చు నుండి తప్పించుకోలేకపోయాడు. పార్లమెంటు చట్టాలు, పోక్సో నిబంధనల ఆధారంగా వెలువడిన ఈ తీర్పు.. యువత, ప్రేమికుల మధ్య పెద్ద చర్చకు దారితీయడంతో పాటు ఒక గట్టి హెచ్చరికగా నిలిచింది.