మహారాష్ట్రలోని పుణెను కుదిపేసిన కేతన్ అగర్వాల్ హత్య కేసులో, పోలీసులు దాఖలు చేసిన 5,053 పేజీల ఛార్జ్‌షీట్‌లో (నేరారోపణ పత్రం) అనేక సంచలన విషయాలు వెలుగులోకి వచ్చాయి. ప్రేమ, నమ్మకం, ద్రోహం, పక్కాగా రచించిన కుట్రతో ఓ క్రైమ్ థ్రిల్లర్ సినిమాను మించేలా పుణెకు చెందిన కేతన్ అగర్వాల్ హత్య కేసు సాగింది. ఈ కేసులో పోలీసులు దాఖలు చేసిన 5,053 పేజీల ఛార్జ్‌షీట్, ఇందులో దాగి ఉన్న మిస్టరీలను బయటపెట్టింది.
తన ప్రియురాలు సియా గోయల్ పుట్టినరోజైన జూన్ 19న ఆమెకు సర్‌ప్రైజ్ ఇవ్వాలనే ఉద్దేశంతో, కేతన్ తన వీపుపై సియా పేరును టాటూగా (పచ్చబొట్టు) వేయించుకున్నాడు. కేతన్ ఎంతో ఇష్టంతో, ప్రేమతో టాటూ వేయించుకుంటున్న భావోద్వేగ వీడియో ప్రస్తుతం బయటకు వచ్చింది. కానీ, ఆ కోరిక చివరి వరకు నెరవేరకుండానే అతను ప్రాణాలు కోల్పోవడం అత్యంత విషాదకరం.
ఎందుకంటే, పుట్టినరోజుకు ఒక రోజు ముందే అంటే జూన్ 18వ తేదీనే సియా తన హత్యా ప్రణాళికను అమలు చేయడం ప్రారంభించింది. ట్రెక్కింగ్‌కు వెళ్దామని చెప్పి కేతన్‌ను లోహాగఢ్ (Lohagad) కొండ ప్రాంతానికి తీసుకెళ్లింది. అక్కడ అప్పటికే వేచి ఉన్న చేతన్ చౌదరి అనే వ్యక్తితో కలిసి, కేతన్‌ను వెనుక నుంచి లోయలోకి తోసేసి హత్య చేశారు. ఈ ఘటనను ప్రత్యక్షంగా చూసిన ఓ సాక్షిని కూడా పోలీసులు గుర్తించారు.
ఈ హత్య చేయడానికి ముందు సియా, ఆమె సహచరులు గూగుల్‌లో వెతికిన (Google Search) విషయాలు పోలీసులనే ఆశ్చర్యానికి గురిచేశాయి. ‘సోనమ్ హత్య కేసు’, భారతదేశంలో దొరికే ‘డెత్ క్యాప్ మష్రూమ్’ (విషపూరిత పుట్టగొడుగులు), పుట్టగొడుగులతో కుటుంబాన్ని చంపడం ఎలా, ఐఫోన్ కాల్ హిస్టరీని డిలీట్ చేయడం ఎలా, లోహాగఢ్ కొండ ప్రమాదాలు.. ఇలా అనేక విషయాలను గూగుల్‌లో వెతికి లోతుగా పరిశీలించారు.
మే 28న లోహాగఢ్ కొండ ప్రాంతానికి వెళ్లి రెక్కీ (రిహార్సల్) నిర్వహించిన సియా.. మే 31న కేతన్‌ను అక్కడికి తీసుకెళ్లి ఫోటోలు తీసి చేతన్‌కు పంపింది. అంతేకాకుండా, పుణెలోని లుల్లానగర్ ప్రాంతంలో మనుషులను ఎలా తోసేయాలి అని ‘ప్రాక్టీస్’ (సాధన) చేసిన షాకింగ్ విషయం, హత్య తర్వాత పోలీసులకు ఏం కథ చెప్పాలో ముందుగానే ప్లాన్ చేసుకున్న తీరు.. ఛార్జ్‌షీట్‌లో పొందుపరిచిన మొబైల్ డేటా, డిజిటల్ ఆధారాల ద్వారా బట్టబయలైంది. ప్రియురాలి కోసం వీపుపై పేరు పచ్చబొట్టుగా వేయించుకున్న యువకుడు, అదే ప్రియురాలి చేతిలో లోయలోకి తోయబడి హత్యకు గురైన ఘటన తీవ్ర సంచలనం సృష్టించింది.
Leave a Reply