నేటి ఉరుకుల పరుగుల జీవితంలో, ముఖ్యంగా ఉద్యోగాలు చేసే మహిళలకు, కళారంగంలో ఉండే స్త్రీలకు క్యాబ్‌‌లు (అద్దె కార్లు) ఎంతో సౌకర్యవంతంగా మారాయి. కానీ, అదే క్యాబ్‌లలో మహిళల భద్రత ఎంతటి ప్రశ్నార్థకంగా మారిందో మరో చేదు ఘటన మనకు మళ్లీ గుర్తుచేసింది.
ప్రముఖ మ్యూజిషియన్, నేపథ్య గాయని శ్రియా రావు (Shriya Rao).. ఉబర్ కారులో ప్రయాణిస్తున్నప్పుడు తనకు ఎదురైన అసహ్యకరమైన అనుభవాన్ని సోషల్ మీడియాలో పంచుకోవడం ప్రస్తుతం తీవ్ర కలకలం రేపుతోంది. రోజువారీ పని నిమిత్తం ఉబర్ క్యాబ్ బుక్ చేసుకుని ప్రయాణించిన శ్రియకు, ఆ ప్రయాణం తీవ్ర మానసిక వేదనను, భయానక అనుభవాన్ని మిగిల్చింది.
ప్రయాణ సమయంలో కారు నడపాల్సిన డ్రైవర్, రోడ్డుపై దృష్టి పెట్టడం మానేసి.. తరచూ వెనక్కి తిరిగి శ్రియ కాళ్ల వైపు అసభ్యకర రీతిలో తదేకంగా చూడసాగాడు. చాలాసార్లు ఓపిక పట్టిన శ్రియ, డ్రైవర్ చూపులు, ప్రవర్తన పూర్తిగా తేడాగా ఉన్నాయని గ్రహించి తీవ్ర దిగ్భ్రాంతికి, భయాందోళనకు గురయ్యారు.
ఒక దశ దాటాక సహనం కోల్పోయిన ఆమె, తాను ఎదుర్కొన్న ఈ అసహ్యకరమైన అనుభవాన్ని వీడియో తీసి, ఉబర్ సంస్థను ట్యాగ్ చేస్తూ సోషల్ మీడియాలో పోస్ట్ చేశారు. “ఒక మహిళ ఒంటరిగా ప్రయాణించలేని స్థాయిలో సమాజంలో ఇలాంటి వ్యక్తుల ఆగడాలు పెరిగిపోయాయి” అంటూ ఆమె పెట్టిన పోస్ట్ ఇంటర్నెట్‌లో దావానలంలా వ్యాపించి, వేలాది మంది ఆగ్రహానికి కారణమైంది.
ఈ పోస్ట్ వైరల్ కావడంతో తక్షణమే స్పందించిన ఉబర్ సంస్థ.. “బాధిత ప్రయాణికురాలికి ఎదురైన ఈ చేదు అనుభవానికి తీవ్ర విచారం వ్యక్తం చేస్తున్నాం. సదరు డ్రైవర్‌పై తగిన చర్యలు తీసుకుంటున్నాం” అని బదులిచ్చింది. అయితే, ఇలాంటి ఘటనలు జరిగినప్పుడు క్యాబ్ సంస్థలు ఇచ్చే రొటీన్ సమాధానాలు మాత్రమే సరిపోవని ప్రజలు ప్రశ్నిస్తున్నారు.
మహిళల భద్రతకు భంగం కలిగించే డ్రైవర్లపై కేవలం ‘అకౌంట్ బ్లాక్ చేయడం’ వంటి తాత్కాలిక చర్యలతో సరిపెట్టకుండా, చట్టపరంగా కఠిన శిక్షలు విధించాలన్నదే అందరి డిమాండ్. మహిళా ప్రయాణికులు ప్రశాంతంగా ప్రయాణించలేని పరిస్థితి నెలకొనడం, మన సమాజ భద్రతా వ్యవస్థపై పడిన అతిపెద్ద మచ్చగా భావించాల్సి ఉంటుంది.
Leave a Reply