చిన్నతనం నుంచే “తల్లిదండ్రులు దేవుళ్లతో సమానం” అని వింటూ పెరిగిన మనకు, ఆ నమ్మకాన్నే ప్రశ్నించేలా ఒక స్టార్టప్ సంస్థ సీఈఓ (CEO) చేసిన పోస్ట్ ప్రస్తుతం సోషల్ మీడియాలో తీవ్ర చర్చకు దారితీసింది.
గురుగ్రామ్‌కు చెందిన Knot Dating యాప్ కో-ఫౌండర్, సీఈఓ అయిన జస్‌వీర్ సింగ్, ఎక్స్ (X) వేదికగా తల్లిదండ్రుల గురించి తన అభిప్రాయాలను పంచుకున్నారు. “తల్లిదండ్రులు దేవుళ్లు కారు; వారిని దేవుళ్లలా చూడటం ఆపేయాలి” అని ఆయన చేసిన వ్యాఖ్యలు అందరి దృష్టిని ఆకర్షించాయి.
కేవలం పిల్లలను కనడం వల్లే ఒకరు రాత్రికి రాత్రే పరిపూర్ణమైన మనిషిగా మారిపోరని, లేదా ఎల్లప్పుడూ సరైన నిర్ణయాలే తీసుకోలేరని ఆయన తన పోస్ట్‌లో పేర్కొన్నారు. పిల్లలను కనడం అనేది ఒక సహజమైన ప్రక్రియ అని, అంతమాత్రాన ఎవరికీ ప్రత్యేక హోదా రాదని ఆయన తెలిపారు. అలాగే “తల్లిదండ్రులు చెప్పేది పిల్లలు ఎల్లప్పుడూ వినాలి; వారు తల్లిదండ్రులు అయినందుకే వారి ప్రతి నిర్ణయాన్నీ ఆమోదించాలి” అనే సామాజిక దృక్పథాన్ని కూడా ఆయన ప్రశ్నించారు.
అంతేకాకుండా, కొందరు తల్లిదండ్రులు పిల్లలను ప్రత్యేక వ్యక్తులుగా చూడటానికి బదులుగా తమ ఆస్తిగా భావించి పెంచుతున్నారని, తాము నెరవేర్చుకోలేని కోరికలను, కలలను పిల్లలపై రుద్దుతున్నారని ఆయన విమర్శించారు. ముఖ్యంగా పిల్లల జీవితం, ఇష్టాలు, భవిష్యత్తు ఎంపికలు వంటి విషయాల్లో తల్లిదండ్రులకే పూర్తి హక్కు ఉందనే భావనను ఆయన ప్రశ్నించడం గమనార్హం. దీనివల్ల భారతీయ కుటుంబ వ్యవస్థలో సుదీర్ఘకాలంగా ఉన్న తల్లిదండ్రులు-పిల్లల సంబంధాల గురించిన అంచనాలు మళ్లీ చర్చనీయాంశమయ్యాయి.
ఈ పోస్ట్ వెలువడిన వెంటనే సోషల్ మీడియాలో అభిప్రాయాలు రెండుగా చీలిపోయాయి. పిల్లల జీవితాల్లో తల్లిదండ్రులు తమ ఇష్టాలను, కలలను రుద్దడం సరికాదని, పిల్లలకు కూడా తమ జీవితాన్ని ఎంచుకునే హక్కు ఉండాలని కొందరు ఆయనకు మద్దతు తెలిపారు. మరోవైపు, పిల్లలను పెంచడానికి తల్లిదండ్రులు చేసే త్యాగాలు, కష్టం, ఆప్యాయతలను కేవలం “సహజమైన ప్రక్రియ” అని కొట్టిపారేయడం సరికాదని చాలామంది వ్యతిరేకించారు. ఈ విధంగా జస్‌వీర్ సింగ్ చేసిన ఈ సోషల్ మీడియా పోస్ట్.. తల్లిదండ్రుల పట్ల గౌరవం, పిల్లల వ్యక్తిగత స్వేచ్ఛ మరియు భారతీయ కుటుంబ సంప్రదాయాలపై ఇంటర్నెట్‌లో పెద్ద చర్చకే తెరలేపింది.
Leave a Reply