గత 2017 మార్చి నెలలో, దక్షిణ కొరియా పరిస్థితుల గురించి సీనియర్ విశ్లేషకుడు రాబర్ట్ కెల్లీ బీబీసీ లైవ్ టీవీలో అత్యంత సీరియస్‌గా మాట్లాడుతుండగా, అతని 4 ఏళ్ల కూతురు గదిలోకి ప్రవేశించి చిలిపిగా డ్యాన్స్ చేసిన దృశ్యం ఇంటర్నెట్‌లో ఎంత వైరల్ అయిందో తెలిసిందే.
ఆమె వెనుకే, అతని చిన్న కుమారుడు తన వాకర్‌లో గదిలోకి ప్రవేశించాడు. ఇది చూసి కంగారుపడిన రాబర్ట్ భార్య జుంగ్-ఆ కిమ్, పరుగెత్తుకుంటూ వచ్చి ఆ ఇద్దరు పిల్లలను హడావుడిగా బయటకు లాక్కెళ్లిన దృశ్యం ప్రపంచవ్యాప్తంగా ప్రత్యక్ష ప్రసారం కావడంతో వీక్షకులను ఎంతగానో నవ్వించింది.
నెటిజన్లు ముద్దుగా ‘బీబీసీ డాడ్’ (BBC Dad) అని పిలుచుకునే ఈ వీడియో, యూట్యూబ్‌లో కోట్ల కొద్దీ వ్యూస్ సాధించి సంచలనంగా మారింది. ముఖ్యంగా కరోనా సమయంలో ఇంటి నుంచి పనిచేసిన (Work from Home) చాలా మంది ఈ సంఘటనను తమ సొంత జీవితాలకు అన్వయించుకుని మురిసిపోయారు.
అయితే, ఈ సరదా సంఘటన జరిగి దాదాపు 9 ఏళ్లు పూర్తవుతున్న తరుణంలో, రాబర్ట్ కెల్లీ తన కుటుంబం కొత్త ఫోటోలను సోషల్ మీడియాలో పంచుకున్నారు. అందులో నాడు చిలిపి పనులు చేసిన 4 ఏళ్ల కూతురు మారియన్‌కు ఇప్పుడు 13 ఏళ్లు, వాకర్‌లో వచ్చిన కుమారుడు జేమ్స్‌‌కు ఇప్పుడు 10 ఏళ్లు వచ్చాయని తెలిసింది.
కాలం ఇట్టే గడిచిపోయి పిల్లలిద్దరూ బాగా ఎదిగిన ఈ కొత్త ఫోటోలు ప్రస్తుతం ఇంటర్నెట్‌లో మళ్లీ వైరల్‌గా మారుతున్నాయి. ఇది చూసిన నెటిజన్లు ఆనాటి మధురమైన క్షణాన్ని గుర్తుచేసుకుంటూ, పిల్లల ప్రస్తుత ఎదుగుదలను చూసి ఆశ్చర్యపోతూ కామెంట్లు పెడుతున్నారు.
Leave a Reply