బీహార్‌లోని దర్భంగా జిల్లాలో దారుణ ఘటన చోటుచేసుకుంది. తిన్న భోజనానికి రూ.3,180 బిల్లు చెల్లించాలంటూ అడిగిన రెస్టారెంట్ యజమానిపై సుమారు 20 మంది వ్యక్తులు దాడి చేశారని ఆరోపణలు వచ్చాయి. ఇనుప రాడ్లు, కర్రలు, పదునైన ఆయుధాలతో రెస్టారెంట్‌లోకి ప్రవేశించి విధ్వంసం సృష్టించినట్లు ఫిర్యాదు నమోదైంది.
దర్భంగా జిల్లాలోని సర్వే కార్యాలయ ప్రాంగణంలో నిర్వహిస్తున్న ఓ రెస్టారెంట్‌లో ఈ ఘటన జరిగినట్లు సమాచారం.
రెస్టారెంట్ యజమాని సుమిత్ కుమార్ ఝా తెలిపిన వివరాల ప్రకారం.. కొన్ని రోజుల క్రితం దీపక్ ఝా అనే వ్యక్తి తన స్నేహితులతో కలిసి రెస్టారెంట్‌కు వచ్చి భోజనం చేశాడు. అయితే రూ.3,180 బిల్లు చెల్లించకుండా, తర్వాత డబ్బులు ఇస్తానని చెప్పి వెళ్లిపోయాడని సుమిత్ ఆరోపించారు.
ఆ తర్వాత పలుమార్లు డబ్బులు అడిగినా బిల్లు చెల్లించలేదని తెలిపారు.
ఈ క్రమంలో ఘటన జరిగిన రోజు దీపక్ ఝా సుమారు 20 మంది యువకులతో కలిసి రెస్టారెంట్‌కు వచ్చినట్లు సుమిత్ చెప్పారు. వారి చేతుల్లో ఇనుప రాడ్లు, ప్లాస్టిక్ పైపులు, కర్రలు, పదునైన ఆయుధాలు ఉన్నాయని ఆరోపించారు.
ఆ గుంపు రెస్టారెంట్‌లోని వస్తువులను ధ్వంసం చేయడం ప్రారంభించడంతో అడ్డుకునేందుకు ప్రయత్నించానని, దీంతో తనపై విచక్షణారహితంగా దాడి చేశారని సుమిత్ తెలిపారు. ఈ దాడిలో ఆయన తలకు తీవ్ర గాయమై రక్తస్రావం జరిగినట్లు సమాచారం.
అంతేకాకుండా రెస్టారెంట్‌లో పనిచేస్తున్న మహిళా సిబ్బందితో కూడా ఆ గుంపు అసభ్యంగా ప్రవర్తించినట్లు ఆరోపణలు వచ్చాయి.
ఈ ఘటన మొత్తం అక్కడ ఏర్పాటు చేసిన సీసీటీవీ కెమెరాల్లో రికార్డైనట్లు తెలుస్తోంది. ప్రస్తుతం ఆ ఫుటేజీ ఆధారంగా ఘటనలో పాల్గొన్న వ్యక్తులను గుర్తించే పనిలో పోలీసులు ఉన్నారు.
రూ.3,180 బిల్లు విషయంలో మొదలైన వివాదం చివరకు రెస్టారెంట్ యజమానిపై దాడి వరకు వెళ్లడం స్థానికంగా చర్చనీయాంశంగా మారింది.
Leave a Reply