“జనరేటర్ ఆన్ చేసి పడుకుంటున్నాం..!” అర్ధరాత్రి ఆఫీస్ గదిలో నిద్రించిన ఇద్దరు ఇంజనీర్లు.. మరుసటి రోజు ఉదయానికి శవాలుగా మారిన భయానక ఘటన. ఆ రాత్రి అక్కడ ఏం జరిగింది..?

ఉత్తరాఖండ్ రాష్ట్రం డెహ్రాడూన్‌లోని ఒక ఇంటర్నెట్ సర్వీస్ సంస్థలో పనిచేస్తున్న ఇద్దరు ఇంజనీర్లు, జనరేటర్ ఉన్న గదిలో నిద్రిస్తూ ప్రాణాలు కోల్పోయిన ఘటన తీవ్ర కలకలం రేపింది.

పటేల్ నగర్ పోలీస్ స్టేషన్ పరిధిలోని ట్రాన్స్‌పోర్ట్ నగర్ ప్రాంతంలో ఈ ఘటన చోటుచేసుకుంది. మృతులను హరిద్వార్‌కు చెందిన రోహిత్ సింగ్ (29), ఉత్తరప్రదేశ్‌‌లోని ఫైజాబాద్‌కు చెందిన లవ్ కుష్ (26)గా గుర్తించారు. ఇంటర్నెట్ సేవల్లో తలెత్తిన సాంకేతిక లోపాన్ని సరిచేసే పని నిమిత్తం వీరిద్దరూ జనరేటర్ గదికి వెళ్లారు.

సెప్టెంబర్ 29 మధ్యాహ్నం ఆ సంస్థ ఇంటర్నెట్ సేవల్లో సాంకేతిక లోపం తలెత్తినట్లు సమాచారం. దీంతో చండీగఢ్‌లోని ప్రధాన కార్యాలయం ఆదేశాల మేరకు వారిద్దరూ జనరేటర్‌ను ఆన్ చేసేందుకు అక్కడికి వెళ్లారు. జనరేటర్‌లో ఆయిల్ పోసి దాన్ని ఆన్ చేసిన తర్వాత, వేకువజామున 2:30 గంటల ప్రాంతంలో సీనియర్ ఇంజనీర్ వారికి ఫోన్ చేసి మాట్లాడారు. అప్పుడు అంతా బాగానే ఉందని వారిద్దరూ చెప్పినట్లు సమాచారం. ఆ తర్వాత జనరేటర్, ఏసీ ఆన్‌లో ఉన్న అదే మూసి ఉన్న గదిలో ఇద్దరూ నిద్రపోయారు.

మరుసటి రోజు ఉదయం 7:30 గంటల ప్రాంతంలో సీనియర్ ఇంజనీర్ మళ్లీ వారిద్దరికీ ఫోన్ చేయగా ఎలాంటి స్పందన రాలేదు. దీంతో అనుమానం వచ్చిన సహోద్యోగి గుర్మీత్.. జనరేటర్ గది వద్దకు వెళ్లాడు. తలుపు తెరిచి చూడగా గదిలో పొగ నిండి ఉందని, వారిద్దరూ స్పృహతప్పి నేలపై పడి ఉన్నారని తెలిసింది. వెంటనే వారిని ఆసుపత్రికి తరలించగా, అప్పటికే వారు మృతి చెందినట్లు వైద్యులు ధృవీకరించారు.

ఈ ఘటనపై సమాచారం అందుకున్న పటేల్ నగర్ పోలీసులు, ఫోరెన్సిక్ బృందం ఘటనా స్థలానికి చేరుకుని విచారణ చేపట్టారు. మూసి ఉన్న గదిలో జనరేటర్ నడవడం వల్ల వెలువడిన విషవాయువు, ముఖ్యంగా కార్బన్ మోనాక్సైడ్ గదిలో పేరుకుపోయి ఉంటుందని.. ఆక్సిజన్ కొరతతో ఊపిరి ఆడకపోవడం వల్లే వారిద్దరూ ప్రాణాలు కోల్పోయి ఉండొచ్చని ప్రాథమిక దర్యాప్తులో తేలింది. కాగా, రోహిత్ గత 7 ఏళ్లుగా ఆ సంస్థలో పనిచేస్తున్నాడని, నెలకు రూ.18,000 జీతం తీసుకుంటున్నాడని అతని కుటుంబ సభ్యులు తెలిపారు. మరణానికి గల ఖచ్చితమైన కారణం, ఈ ఘటనలో మరేవైనా ఇతర కోణాలు ఉన్నాయా అనే దానిపై పోలీసులు లోతైన దర్యాప్తు కొనసాగిస్తున్నారు.