భూమి మొత్తం విస్తీర్ణంలో గణనీయమైన భాగం అడవులతో నిండి ఉంది. వాతావరణ సమతుల్యత, జీవవైవిధ్య పరిరక్షణ, నేల సారం, నీటి చక్రం వంటి వివిధ ప్రకృతి ప్రక్రియల్లో అడవులు కీలక పాత్ర పోషిస్తాయి.
కానీ, చెప్పుకోదగ్గ స్థాయిలో సహజంగా ఏర్పడిన అడవులు లేని దేశాలు కూడా ప్రపంచంలో ఉన్నాయి. వాటిలో ఖతార్, జిబ్రాల్టర్, నౌరు మరియు మొనాకోలు ఉన్నాయి.
అరేబియన్ ద్వీపకల్పంలో ఉన్న ఖతార్‌లో ఎక్కువ భాగం పొడి ఎడారి వాతావరణాన్ని కలిగి ఉంటుంది. అధిక ఉష్ణోగ్రత, తక్కువ వర్షపాతం మరియు ఉప్పుతో కూడిన నేల వంటి కారణాల వల్ల సహజంగా అడవులు పెరిగే వాతావరణం అక్కడ తక్కువ. అదే సమయంలో, ఖతార్‌లో మనుషులు పెంచే పచ్చని ప్రాంతాలు, అలంకరణ మొక్కల నిర్వహణ కొనసాగుతోంది. అయితే వీటిని సహజ అడవులుగా పరిగణించరు.
ఐబీరియన్ ద్వీపకల్పం దక్షిణ కొసన ఉన్న జిబ్రాల్టర్ భూభాగం చాలా కఠినంగా, ఇరుకుగా ఉంటుంది. దీంతో పెద్ద ఎత్తున సహజ అడవులు పెరిగేందుకు అక్కడ స్థలం లేదు. మధ్య పసిఫిక్ ప్రాంతంలో ఉన్న చిన్న ద్వీప దేశమైన నౌరులో ఫాస్ఫేట్ మైనింగ్ పనులు సహజ వృక్షజాలం పెరుగుదలను తీవ్రంగా దెబ్బతీశాయి. మైనింగ్ కారణంగా భూమిలో కొంత భాగం పాడవడంతో పాటు, నేల సారం కూడా దెబ్బతింది.
ఐరోపాలోని చిన్న దేశమైన మొనాకో కేవలం 2 చదరపు కిలోమీటర్ల విస్తీర్ణాన్ని మాత్రమే కలిగి ఉంటుంది. అధిక పట్టణీకరణ మరియు తక్కువ భూభాగం కారణంగా అక్కడ సహజ అడవులు లేవు. రోడ్డు పక్కన చెట్లు, పార్కులు, పచ్చని ప్రాంతాలు ఉన్నప్పటికీ వాటిని సహజ అడవులుగా లెక్కించరు. కాబట్టి, ఈ నాలుగు ప్రాంతాల్లో చెట్లు లేదా పచ్చదనం పూర్తిగా లేదని చెప్పే బదులు, చెప్పుకోదగ్గ స్థాయిలో సహజ అడవులు లేవని చెప్పడమే సరైన వివరణ.
Leave a Reply