“71 ఏళ్ల వరకు జీవిస్తున్నాం.. కానీ అందులో 60.6 ఏళ్లు మాత్రమే ఆరోగ్యంగానా?” పాకిస్థాన్‌ను దాటిన భారత్.. బంగ్లాదేశ్‌ను ఇంకా ఎందుకు దాటలేకపోయింది? అధ్యయనంలో వెల్లడైన ఆసక్తికర విషయాలు!

ప్రపంచ ఆరోగ్య సంస్థ (WHO) తాజా 2023 ప్రపంచ ఆరోగ్య అంచనాల ప్రకారం, భారతీయుల సగటు ఆయుర్దాయం 71 ఏళ్లుగా ఉంది. ఇది పాకిస్థాన్ (68.2 ఏళ్లు) కంటే ఎక్కువైనప్పటికీ, బంగ్లాదేశ్ (72.7 ఏళ్లు) కంటే 1.7 ఏళ్లు తక్కువ. ఇక అమెరికాలో 78.5 ఏళ్లు, కెనడాలో 81.4 ఏళ్లు సగటు ఆయుర్దాయంగా నమోదైంది.

కరోనా సమయంలో భారతదేశ సగటు ఆయుర్దాయం గణనీయంగా తగ్గింది. 2019లో 70.5 ఏళ్లుగా ఉండగా, 2021 నాటికి 68.1 ఏళ్లకు పడిపోయింది. ఆ తర్వాత 2022లో 70.5 ఏళ్లకు, 2023లో 71 ఏళ్లకు పెరిగింది. అంటే, 2021 నుంచి 2023 వరకు ఈ రెండేళ్ల వ్యవధిలో 2.9 ఏళ్లు కోలుకుంది.

అయితే, ఒక వ్యక్తి ఎన్ని సంవత్సరాలు జీవిస్తున్నాడు అనే దానికంటే, అందులో ఎన్ని సంవత్సరాలు మంచి ఆరోగ్యంతో జీవిస్తున్నాడు అనేది చాలా ముఖ్యం. భారతదేశ ఆరోగ్యకరమైన ఆయుర్దాయం (Healthy life expectancy) 2023లో 60.6 ఏళ్లుగా ఉంది. ఇది 2019లో 60.5 ఏళ్లుగా ఉండగా, కరోనా సమయంలో (2021లో) 58.4 ఏళ్లకు తగ్గి, ఆ తర్వాత మళ్లీ కోలుకుంది. దీని ద్వారా సగటు ఆయుర్దాయం పెరిగినప్పటికీ, ఆరోగ్యంగా జీవించే సంవత్సరాలు మాత్రం అదే వేగంతో పెరగడం లేదని తెలుస్తోంది.

2023 అంచనాల ప్రకారం.. 60 ఏళ్లకు చేరుకున్న ఒక భారతీయుడు సగటున మరో 18.8 సంవత్సరాలు జీవించగలడని అంచనా వేశారు. అందులో 13.7 సంవత్సరాలు పూర్తి ఆరోగ్యంతో ఉంటారని భావిస్తున్నారు. అదే సమయంలో, భారతదేశంలో వ్యాధుల స్వభావం కూడా మారింది. 2000వ సంవత్సరంలో మరణాలకు అంటువ్యాధులు ప్రధాన కారణం కాగా, 2023 నాటికి గుండె జబ్బులు, పక్షవాతం, మధుమేహం వంటి దీర్ఘకాలిక అంటువ్యాధేతర (Non-communicable) వ్యాధుల ముప్పు పెరిగింది. కాబట్టి, ఎక్కువ కాలం జీవించడాన్ని మించి, ఆ సంవత్సరాలను ఆరోగ్యంగా గడపడమే తదుపరి ప్రధాన సవాలుగా ఉందని ప్రపంచ ఆరోగ్య సంస్థ (WHO) స్పష్టం చేసింది.