“చిన్నారిపై లైంగిక వేధింపులకు పాల్పడిన కామాంధుడు.. స్థానికుల దేహశుద్ధిలో ప్రాణాలు కోల్పోయిన వైనం!”.. తీవ్ర కలకలం రేపిన లైంగిక దాడి ఘటన..!!!

మహారాష్ట్రలోని నాగ్‌పూర్‌లో ఓ మైనర్ బాలికపై లైంగిక వేధింపులకు యత్నించిన వ్యక్తిని స్థానికులు పట్టుకుని దేహశుద్ధి చేయగా, తీవ్ర గాయాలపాలైన అతడు ఆసుపత్రిలో చికిత్స పొందుతూ మృతి చెందిన ఘటన ఆ ప్రాంతంలో తీవ్ర సంచలనాన్ని, ఉద్రిక్తతను రేపింది.

నాగ్‌పూర్ పరిసర ప్రాంతానికి చెందిన ఓ చిన్నారి తన ఇంటి సమీపంలో ఆడుకుంటుండగా, అక్కడికి వచ్చిన ఒక వ్యక్తి ఆమెపై లైంగిక దాడికి యత్నించాడు. దీంతో తీవ్ర భయాందోళనకు గురైన ఆ బాలిక కేకలు వేయడంతో, కుటుంబ సభ్యులు, స్థానికులు పరుగున వచ్చి అతడిని రెడ్ హ్యాండెడ్‌గా పట్టుకున్నారు.

పసిపాపపై అఘాయిత్యానికి ఒడిగట్టిన ఆ కామాంధుడి చర్యపై స్థానికులు తీవ్ర ఆగ్రహం వ్యక్తం చేశారు. అతడిని చుట్టుముట్టి చితకబాదారు. స్థానికుల దాడిలో తీవ్ర రక్తస్రావమై అపస్మారక స్థితికి చేరుకున్న ఆ వ్యక్తిని సమాచారం అందుకున్న పోలీసులు రక్షించి వెంటనే ప్రభుత్వ ఆసుపత్రికి తరలించారు.

అయితే, ఐసీయూలో చికిత్స పొందుతూ పరిస్థితి విషమించడంతో అతడు మృతి చెందాడు. ఈ ఘటనపై నాగ్‌పూర్ పోలీసులు రెండు వేర్వేరు కేసులు నమోదు చేశారు. చిన్నారిపై లైంగిక వేధింపులకు పాల్పడినందుకు ఒక కేసు, అతడిని కొట్టి చంపినందుకు గుర్తుతెలియని స్థానికులపై మరో కేసు నమోదు చేసి సమగ్ర దర్యాప్తు జరుపుతున్నారు.