చిలీ దేశంలోని లాస్ కాండెస్‌ ప్రాంతంలో భారీ వర్షాల కారణంగా తీవ్రమైన కొండచరియలు విరిగిపడ్డాయి. ఆ సమయంలో ఉధృతంగా దూసుకొచ్చిన బురద, రాళ్ల ప్రవాహం అక్కడ ఉన్న ‘ఓక్సో’ (Oxxo) అనే ప్రముఖ సూపర్‌మార్కెట్‌లోకి చొరబడి భారీ వినాశనాన్ని సృష్టించింది.
భవనం ముందు భాగం నుంచి ఒక్కసారిగా విరుచుకుపడిన వరద ఉధృతికి.. దుకాణంలో ఉన్న వస్తువులు, ర్యాకులు, యంత్రాలు సమస్తం కొట్టుకుపోయిన దృశ్యాలు అక్కడి నిఘా కెమెరాల్లో రికార్డయ్యాయి.
షాపులో పనిచేస్తున్న ఒక ఉద్యోగి బయట పరిస్థితిని తన మొబైల్ ఫోన్‌లో వీడియో తీస్తుండగా, క్షణాల వ్యవధిలోనే బురద ప్రవాహం లోపలికి పోటెత్తింది. దీంతో అతడు ప్రాణభయంతో కేకలు వేస్తూ అక్కడి నుంచి పరుగులు తీశాడు.
ఈ ఘటనలో మరింత తీవ్రమైన షాకింగ్ దృశ్యం ఏమిటంటే.. వరద ఉధృతికి కొట్టుకువచ్చిన ఒక కారు, దుకాణం ముందరి అద్దాలను బద్దలు కొట్టుకుంటూ నేరుగా లోపలికి దూసుకురావడం అక్కడున్న వారిని భయాందోళనలకు గురిచేసింది.
నడుము లోతు వరకు పేరుకుపోయిన బురద వరద నుంచి ఉద్యోగులు తృటిలో ప్రాణాలతో బయటపడగా, సహాయక బృందాలు ఘటనా స్థలానికి చేరుకుని ముమ్మరంగా సహాయక చర్యలు చేపట్టాయి.