టెక్నాలజీ ఇచ్చిన భద్రతా ఫీచర్లతో తలపట్టుకున్న ఓ దొంగకు సంబంధించిన ఆసక్తికర ఘటన ఇప్పుడు సోషల్ మీడియాలో వైరల్‌గా మారింది.
విలువైన ఐఫోన్‌ను దొంగిలించిన ఓ వ్యక్తి.. దాని పాస్‌వర్డ్ తెలియక ఫోన్‌ను ఉపయోగించలేకపోయాడు. కనీసం దాన్ని ఇతరులకు విక్రయించడానికి కూడా ఇబ్బంది పడటంతో, చివరికి ఫోన్ యజమాని కుటుంబ సభ్యులనే పాస్‌వర్డ్ అడగాలని నిర్ణయించుకున్నాడు.
ఈ క్రమంలో ఫోన్ యజమాని చెల్లెలి మొబైల్‌కు ఓ మెసేజ్ పంపించాడు. అందులో, “నేను మీ సోదరుడి ఐఫోన్‌ను దొంగిలించాను. కానీ దాని పాస్‌వర్డ్ తెలియడం లేదు. ఫోన్‌ను ఉపయోగించలేకపోతున్నాను, అమ్మలేకపోతున్నాను. దయచేసి పాస్‌వర్డ్ చెప్పండి” అంటూ కోరినట్లు సమాచారం.
దొంగతనం చేసిన వ్యక్తే నేరుగా తమకు మెసేజ్ చేసి పాస్‌వర్డ్ అడగడంతో ఆ యువతి, ఆమె కుటుంబ సభ్యులు ఆశ్చర్యపోయినట్లు కథనం పేర్కొంది.
సాధారణంగా ఐఫోన్‌లలో ఉండే పాస్‌కోడ్, యాక్టివేషన్ లాక్ వంటి భద్రతా వ్యవస్థల కారణంగా అనుమతి లేకుండా ఫోన్‌ను అన్‌లాక్ చేయడం కష్టమవుతుంది. దీంతో పాస్‌వర్డ్ తెలియని దొంగ చివరకు ఫోన్ యజమాని కుటుంబ సభ్యులనే ఆశ్రయించినట్లు తెలుస్తోంది.
ఈ వింత ఘటనకు సంబంధించిన మెసేజ్ సోషల్ మీడియాలో వైరల్ కావడంతో నెటిజన్లు సరదాగా స్పందిస్తున్నారు.
“దొంగతనం చేయడంలో చూపించిన తెలివిని ఫోన్ లాక్ తెరవడంలో చూపించలేకపోయాడు!” అంటూ కొందరు కామెంట్లు చేస్తున్నారు. మరికొందరు మాత్రం ఐఫోన్ భద్రతా ఫీచర్లను ప్రశంసిస్తున్నారు.