“ఇంట్లో ఒంటరిగా ఉన్న మహిళ.” భవనం పైనుంచి కిందపడిన దృశ్యాలు కెమెరాలో రికార్డ్! ప్రమాదమా, మరేదైనా కారణమా?

బీహార్‌లోని పాట్నా సమీపంలో ఉన్న ఫుల్వారీ షరీఫ్ ప్రాంతంలో ఒక మహిళ భవనం పైనుంచి కిందపడి మృతి చెందిన ఘటన స్థానికంగా తీవ్ర దిగ్భ్రాంతికి గురిచేసింది.

అక్టోబర్ 8వ తేదీ సాయంత్రం ఈ ఘటన చోటుచేసుకోగా, మరణించిన మహిళను మంజు దేవిగా గుర్తించారు. ఆమె భవనం పైనుంచి కింద పడుతున్న దృశ్యాలు పక్కనే ఉన్న సీసీటీవీ కెమెరాలో రికార్డయ్యాయి. ఈ వీడియో ఫుటేజీ వెలుగులోకి రావడంతో పోలీసులు దర్యాప్తు ముమ్మరం చేశారు.

స్థానికులు తెలిపిన వివరాల ప్రకారం.. మంజు దేవి భర్త చనిపోవడంతో ఆమె ఇంట్లో ఒంటరిగా నివసిస్తోంది. ఆమెకు ఒక కూతురు ఉండగా, అప్పుడప్పుడు వచ్చి తల్లిని కలిసి వెళ్తుండేది. రోజూలాగే బట్టలు ఆరేయడానికి గురువారం సాయంత్రం కూడా ఆమె మేడపైకి వెళ్లింది. ఆ సమయంలో అనూహ్యంగా పైనుంచి కిందపడి తీవ్ర గాయాలపాలై అక్కడికక్కడే ప్రాణాలు కోల్పోయింది.

సమాచారం అందుకున్న వెంటనే పోలీసులు ఘటనా స్థలానికి చేరుకుని ఆధారాలు సేకరించారు. సీసీటీవీ ఫుటేజీని పరిశీలించినప్పటికీ, కేవలం ఆ దృశ్యాల ఆధారంగా మరణానికి గల కచ్చితమైన కారణాన్ని నిర్ధారించలేమని అధికారులు స్పష్టం చేశారు.

ఈ మరణం ప్రమాదవశాత్తు జరిగిందా? లేక ఆత్మహత్య/హత్య లాంటి మరేదైనా కారణం ఉందా? అనే కోణంలో పోలీసులు లోతుగా విచారిస్తున్నారు. ఆమె మొబైల్ కాల్ డేటా (చివరిగా ఎవరితో మాట్లాడారు?), భవనం ఎత్తు, కింద పడిన ప్రదేశం వంటి కోణాల్లో విశ్లేషిస్తున్నారు. ఫోరెన్సిక్ నివేదిక, పూర్తిస్థాయి దర్యాప్తు పూర్తయిన తర్వాతే మంజు దేవి మరణం వెనుక ఉన్న అసలు కారణం స్పష్టమవుతుందని పోలీసులు వెల్లడించారు.