రేపు ఢిల్లీలో ఏం జరగబోతోంది.? వీధి వీధినా మైకుల్లో పోలీసుల హెచ్చరికలు.! “పిల్లలను, ఇరుగుపొరుగు వారిని అప్రమత్తం చేయండి.!” ఆందోళనకు అనుమతి నిరాకరణ, 25 వేల మందికి పైగా భద్రతా బలగాల మోహరింపు.!!!

ఢిల్లీలో అక్టోబర్ 10వ తేదీన సీజేపీ (CJP), విద్యార్థి సంఘాలు తలపెట్టిన ఆందోళన కార్యక్రమం నేపథ్యంలో పోలీసులు భద్రతా చర్యలను తీవ్రతరం చేశారు. ఈ నిరసన కార్యక్రమానికి అనుమతి నిరాకరించిన పోలీసులు, ప్రజలెవరూ ఇందులో పాల్గొనవద్దని నగరంలోని పలు ప్రాంతాల్లో లౌడ్‌స్పీకర్ల ద్వారా హెచ్చరికలు జారీ చేస్తున్నారు.

ఈశాన్య ఢిల్లీలోని హర్ష్ విహార్ తదితర ప్రాంతాల్లో పోలీసులు ముమ్మరంగా గస్తీ తిరుగుతూ, వీధి వీధినా తిరుగుతూ ప్రజలను అప్రమత్తం చేస్తున్నారు. ఆందోళనల గురించి పిల్లలకు, చుట్టుపక్కల వారికి కూడా చెప్పి ఎవరూ బయటకు రాకుండా చూసుకోవాలని పోలీసులు ప్రజలను కోరుతున్నారు.

ప్రధాన ఎన్నికల కమిషనర్ జ్ఞానేష్ కుమార్ రాజీనామా చేయాలనే తదితర డిమాండ్లతో జంతర్ మంతర్ వద్ద భారీ ఆందోళన చేపట్టాలని సీజేపీ, విద్యార్థి సంఘాలు ప్రణాళికలు సిద్ధం చేసుకున్నాయి. అయితే, అనుమతి కోరుతూ దరఖాస్తును ఆలస్యంగా సమర్పించడం, గతంలో జరిగిన ఆందోళనల్లో వీరు నిబంధనలు పాటించలేదనే ఆరోపణలు ఉండటం, శాంతిభద్రతల సమస్యలను దృష్టిలో ఉంచుకుని ఢిల్లీ పోలీసులు ఈ నిరసనకు అనుమతి నిరాకరించారు.

అంతేకాకుండా, భారతీయ నాగరిక్ సురక్షా సంహిత (BNSS) లోని సెక్షన్ 163 (గతంలో సెక్షన్ 144) కింద ప్రస్తుతం ఆంక్షలు అమల్లో ఉన్నాయని, అనుమతి లేకుండా గుమిగూడితే కఠినమైన చట్టపరమైన చర్యలు తీసుకుంటామని పోలీసులు హెచ్చరించారు. ఈ ఆందోళనల దృష్ట్యా దేశ రాజధానిలో భద్రతను కట్టుదిట్టం చేయడంతో పాటు, ముందస్తుగా ట్రాఫిక్ ఆంక్షలు కూడా విధించారు.